لوس-اندجەلەستە ورىن العان جويقىن ورمان ءورتى سالدارىنان قازا تاپقاندار سانى 11 ادامعا جەتتى، دەپ حابارلايدى "ادىرنا" ۇلتتىق پورتالى CNN تەلەارناسىنا سىلتەپ.
كاليفورنيا شتاتىنداعى ءورت 7 قاڭتاردا باستالىپ، 12 مىڭ گەكتاردان استام اۋماقتى جالىن شارپىعان. 10 مىڭنان استام ءۇي تولىقتاي كۇلگە اينالدى. ءورتتىڭ جەتى ءىرى وشاعى تىركەلىپ، الەمگە ايگىلى گولليۆۋد جوتاسىنداعى جالىننىڭ بەتى قايتارىلعانىمەن، كينوجۇلدىزداردىڭ ەليتالىق ۇيلەرى ورتەنىپ كەتكەن.
ساراپشىلاردىڭ مالىمەتىنشە، ورتتەن كەلگەن شىعىن 50 ميلليارد دوللاردان اسادى. بيلىك 180 مىڭ تۇرعىنعا شۇعىل تۇردە قاۋىپسىز ايماقتارعا ەۆاكۋاتسيالانۋعا نۇسقاۋ بەردى.
دەگەنمەن، ەل اۋىرتپالىقپەن كۇرەسىپ جاتقاندا، ۇرلىق-قارلىق وقيعالارى دا ورىن الۋدا. پوليتسيا ورتەنگەن اۋداندارداعى يەسىز ۇيلەردى توناعان 20 ادامدى قاماۋعا الدى. كەيبىر ايماقتاردا كومەندانتتىق ساعات ەنگىزىلدى.
ورتتەن كەيىن كاليفورنيا بيلىگى تۇرعىنداردى قاۋىپسىزدىك ەرەجەلەرىن قاتاڭ ساقتاۋعا شاقىردى. تابيعات اپاتىنىڭ سالدارىن جويۋ جانە زارداپ شەككەندەرگە كومەك كورسەتۋ جۇمىستارى جالعاسىپ جاتىر.
