لوس-اندجەلەس وكرۋگىنىڭ شەريفى روبەرت لۋنانىڭ ايتۋىنشا، كەم دەگەندە 13 ادام حابارسىز كەتكەن. ولاردىڭ جوعالىپ كەتكەنى ورتپەن بايلانىستى ما، جوق پا، ازىرگە بەلگىسىز ەكەنى ايتىلدى.
كۋاگەرلەردىڭ ايتۋىنشا قالا ۇستىنەن وتتى تورنادولار كوتەرىلۋدە.
سوڭعى بىرنەشە كۇندە 180 000-نان استام ادام ءوز ۇيلەرىن تاستاپ كەتۋگە ءماجبۇر بولعان. 11 قاڭتاردا ءورت بۇرىن تيىسپەگەن اۋماقتارعا جەتىپ، بيلىك ەۆاكۋاتسيا ايماعىن كەڭەيتتى. جەلدىڭ باسىلۋى مەن ىلعالدىلىقتىڭ ارتۋى ءورتتى باقىلاۋعا مۇمكىندىك بەرگەنىمەن، اقش ۇلتتىق مەتەورولوگيالىق قىزمەتى الداعى اپتادا اۋا رايى جاعدايلارى ءورتتىڭ تارالۋىنا قايتا ىقپال ەتەتىنىن ەسكەرتتى.
قالالىق بيلىك تۇرعىندارعا ءورت سالدارىنان اۋانىڭ لاستانۋىنا بايلانىستى كوشەگە سيرەك شىعۋدى ۇسىندى. اشىق اۋادا جۇمىس ىستەيتىن بارلىق ادامدارعا رەسپيراتور كيۋ كەرەكتىگىن لوس-اندجەلەس وكرۋگىنىڭ دەنساۋلىق ساقتاۋ دەپارتامەنتىنىڭ وكىلى انيش ماحادجان ايتتى.
ەسكە سالا كەتەيىك، اقش-تىڭ توتەنشە جاعدايلار قىزمەتكەرلەرى التى كۇن بويى لوس-اندجەلەستە شىققان جويقىن ورتتەردى سوندىرۋگە تىرىسىپ جاتىر. جۇما كۇنى وتتىڭ جىلدام تارالۋىنا سەبەپ بولعان قاتتى جەل باسەڭدەپ، ءورت سوندىرۋشىلەرگە كەيبىر وشاقتاردى باقىلاۋعا الدى.
جۇما كۇنى جەرگىلىكتى بيلىك ميلليونداعان دوللارعا باعالانعان ءزاۋلىم ۇيلەر تونالۋى مۇمكىن دەگەن قاۋىپكە بايلانىستى كومەندانتتىق ساعات جاريالادى.
