استانادا بىرنەشە رەت الاياقتىق جاسادى دەپ ايىپتالعان ازاماتقا قاتىستى قىلمىستىق ءىس قارالىپ، سوت ۇكىمى شىقتى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
سوت ماتەريالدارىنا سايكەس، ا. ەسىمدى ازامات الەۋمەتتىك جەلىلەردە دۋباي شوكولادى ساتامىن دەپ، جابىرلەنۋشىلەردى الداپ، ولاردىڭ اقشالارىن يەمدەنگەن. ناتيجەسىندە، ول 10 ادامنان جالپى سوماسى 301 020 تەڭگە قاراجات جىمقىرعان.
سوت بارىسىندا ايىپتالۋشىنىڭ كىناسى جابىرلەنۋشىلەردىڭ ايعاقتارى، بانك اۋدارىمدارى جانە ءىس ماتەريالدارىمەن تولىق دالەلدەندى. پروكۋرور سوتتان ا.-عا 3 جىل 6 اي باس بوستاندىعىن شەكتەۋ جازاسىن تاعايىنداۋدى سۇرادى.
سوت ۇكىمىمەن ا. قىلمىستىق كودەكستىڭ 190-بابىنىڭ 3-بولىگىنىڭ 4-تارماعى بويىنشا كىنالى دەپ تانىلىپ، 3 جىلعا باس بوستاندىعى شەكتەلدى.
ايتا كەتەيىك، دۋباي شوكولادى ءبىراز ۋاقىت بۇرىن الەۋمەتتىك جەلىلەردە ترەندكە اينالىپ، سۇرانىس پەن باعاسى كۇرت وسكەن ەدى. بۇل جاعدايدى الاياقتار ءوز پايداسىنا پايدالانعان.
ۇكىم زاڭدى كۇشىنە ەنگەن جوق.
