قاراعاندى وبلىسى مەملەكەت باسشىسىنىڭ باستاماسىمەن جاريالانعان جۇمىسشى ماماندىقتار جىلى اياسىندا جاڭا دەڭگەيگە كوتەرىلۋدە. وڭىردە 300 مىڭعا جۋىق جۇمىسشى مامان ەڭبەك ەتەدى، بۇل وبلىستىڭ ەكونوميكالىق الەۋەتىن ايقىندايتىن ماڭىزدى كورسەتكىش.
الىبەك الدەنەيدىڭ سوزىنشە، وڭىردە بارلىعى 52 كوللەدج جۇمىس ىستەيدى. قازىرگى تاڭدا بۇل وقۋ ورىندارى سەگىز نەگىزگى باعىت بويىنشا كاسىبي مامان دايارلاۋعا بەيىمدەلۋدە. اتاپ ايتساق، ءبىلىم بەرۋ، قۇرىلىس، ەنەرگەتيكا، IT جانە بايلانىس، تاۋ-كەن ونەركاسىبى، جەڭىل ونەركاسىپ، ماشينا جاساۋ جانە اۋىل شارۋاشىلىعى سالالارى قامتىلعان.
سونىمەن قاتار، تەمىرتاۋ مەن قاراعاندىداعى ەكى پوليتەحنيكالىق كوللەدجدى حالىقارالىق اككرەديتتەۋدەن وتكىزۋ جوسپاردا بار. بۇل ستۋدەنتتەرگە الەمدىك ستاندارتتارعا ساي ءبىلىم الىپ، كاسىبي بىلىكتىلىكتى جەتىلدىرۋگە مۇمكىندىك بەرەدى.
بيىل كوللەدجدەرگە ارنالعان گرانتتار سانى 1100-گە ارتتى، ال ستۋدەنتتەر سانى 9200-گە جەتتى. وقۋ باعدارلامالارىنا كاسىپورىندارداعى پراكتيكالىق ساباقتار مەن شەبەرلىك سىنىپتارى ەنگىزىلۋدە. بۇل ستۋدەنتتەردىڭ تەوريالىق بىلىمدەرىن وندىرىستىك تاجىريبەمەن ۇشتاستىرۋىنا ىقپال ەتەدى.
مەملەكەت قولداۋى جۇمىسشى ماماندىقتاردى دامىتۋدا ۇلكەن ءرول اتقارۋدا. ايماقتاعى كاسىبي كادرلار ەل ەكونوميكاسىنىڭ دامۋىنا ەلەۋلى ۇلەس قوسىپ، ۇلتتىق ەكونوميكانىڭ تىرەگىنە اينالماق. «ەڭبەك ءتۇبى – بەرەكە» دەگەن قاعيدا وسى باستامالاردىڭ باستى ۇستانىمى بولماق.
