وزبەكستاننىڭ ءبىرىنشى پرەزيدەنتى يسلام كاريموۆتىڭ قىزى گۇلنارا كاريموۆا تاشكەنت وبلىسىنىڭ زانگياتين اۋدانىندا ورنالاسقان №41 تۇزەتۋ مەكەمەسىنە اۋىستىرىلدى، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
بۇعان دەيىن كاريموۆا №21 ايەلدەر كولونياسىندا جازاسىن وتەپ كەلگەن. كولونيادان كەتەر الدىندا گۇلنارا كاريموۆا جاقىن ارالاسقان سوتتالعان ايەلدەرمەن قوشتاسىپ، ولارمەن قۇشاقتاسقان. ونى كولونيا باسشىسى گۇلرۋح كاريموۆا جانە جازالاردى ورىنداۋ باسقارماسىنان كەلگەن وكىلدەر شىعارىپ سالدى.
"گۇلنارا 5-6 چەمودانىمەن باقىتتى كۇيدە كەتتى. تۇرمەدە جاقىن ارالاسقان قۇربىلارىمەن قۇشاقتاسىپ، قوشتاستى. كاريموۆانى كولونيانىڭ باستىعى گۇلرۋح كاريموۆامەن گۋين-نەن كەلگەندەر ونى شىعارىپ سالدى", – دەدى سوتتالعان ايەلدەردىڭ ءبىرى
سوتتالعان ايەلدەردىڭ ايتۋىنشا، كاريموۆانىڭ اۋىسۋى 2023 جىلدىڭ 19 جەلتوقسانىندا تاشكەنت وبلىسىنىڭ زانگياتين اۋداندىق سوتىنىڭ شەشىمىمەن جۇزەگە اسقان. بۇل شەشىم وزبەكستان قىلمىستىق كودەكسىنىڭ 74-بابى (جازانى جۇمسارتۋ) نەگىزىندە قابىلدانعان.
دەگەنمەن، وزبەكستان ءىىم ءباسپاسوز قىزمەتى، جازالاردى ورىنداۋ دەپارتامەنتى جانە ومبۋدسمەن كەڭسەسى بۇل اقپاراتتى راستاعان جوق، بىراق جوققا دا شىعارمادى.
تۇرمە قىزمەتكەرلەرىنىڭ مالىمدەۋىنشە، گۇلنارا كاريموۆا جازاسىن وتەۋ ءتارتىبىن بىرنەشە رەت بۇزعان. ول مەكەمە ەرەجەلەرىن ءجيى بۇزىپ، كوپتەگەن سوگىس پەن ەسكەرتۋ العان. كەي دەرەكتەرگە سايكەس، ونىڭ اۋىستىرىلۋى كولونيا اكىمشىلىگىنىڭ ءوتىنىشى نەگىزىندە جۇزەگە اسقان. كاريموۆا بۇل كولونيادا جازاسىنىڭ ۇشتەن ءبىر بولىگىن وتەگەن.
