Kókshetaýdaǵy eki qabatty Maǵjan Jumabaev atyndaǵy oblystyq ǵylymı kitaphanada órt boldy, dep habarlaıdy "Adyrna" ulttyq portaly QazTAG-qa siltep.
Bul ǵımaratqa jaqynda ǵana 500 mıllıon teńgege kúrdeli jóndeý júrgizilgen bolatyn.
Aqmola oblysy tótenshe jaǵdaılar departamentiniń málimetinshe, órt 10 sharshy metr aýmaqty qamtyǵan. Birinshi qabatta kitap sóresi tutanyp, órt shyqqan. Zardap shekkender joq. Órttiń sebebi anyqtalýda.
Oqıǵa ornyna barǵan QazTAG redakııasy aqparat taratty.
Órtke oranǵan ǵımarattan kitaptar kóshege shyǵarylǵan. Foıede de otqa zaqymdanǵan kitaptardyń úıindileri jatyr. Órttiń saldarynan ǵımarattyń ishki bóligi qatty búlingen, aldaǵy qalpyna keltirý jumystaryna qosymsha qarajat qajet bolýy múmkin.
Maǵjan Jumabaev atyndaǵy Aqmola oblystyq ǵylymı kitaphanasy 2024 jyldyń jeltoqsanynda kúrdeli jóndeýden keıin ashylǵan bolatyn. Jóndeý jumystaryna bıýdjetten 409 mıllıon teńge bólingen.
Sonymen qatar, «Memlekettik satyp alý» portalyndaǵy málimetterge sáıkes, 2023 jyly kitaphana basshylyǵy ǵımaratty jóndeý jumystaryn aıaqtaý úshin qosymsha tender ótkizgen. Tenderdi «KAZ STROI PLAST» JShS jeńip alǵan, bul jumystardyń quny QQS-ty qosa eseptegende 98,2 mıllıon teńgeni qurady. Osylaısha, kitaphananyń kúrdeli jóndeýine jalpy 500 mıllıon teńge jumsalǵan.
