سەنبى كۇنى سەۋلدىڭ ورتالىعىندا مىڭداعان دەمونسترانتتار جينالىپ، وڭتۇستىك كورەيانىڭ بيلىكتەن شەتتەتىلگەن پرەزيدەنتى يۋن سوك ءيولدىڭ دەرەۋ قاماۋعا الىنۋىن تالاپ ەتتى، دەپ حابارلايدى "ادىرنا" ۇلتتىق پورتالى Kazinform اگەنتتىگىنە سىلتەمە جاساپ.
كورەيا رەسپۋبليكاسى بىرنەشە اپتادان بەرى ءىس جۇزىندە باسشىلىقسىز ءومىر ءسۇرىپ جاتىر. ءبىر اي بۇرىن پارلامەنت يۋن سوك يول مەن ونىڭ ورىنباسارى حان دوك سۋعا يمپيچمەنت جاريالاندى. قازىر ەلدى ەكونوميكا ءمينيسترى باسقارىپ وتىر.
دەمونسترانتتار يۋن سوك يولگە جەلتوقسان ايىنىڭ باسىندا توتەنشە جاعداي ەنگىزۋگە تىرىسقانى ءۇشىن «بۇلىك» جاسادى دەگەن ايىپ تاعىلعانىنا بايلانىستى ونى دەرەۋ قاماۋعا الۋدى تالاپ ەتتى. نارازىلىق بىلدىرۋشىلەردى ىزالاندىرعانى – قۇقىق قورعاۋ ورگاندارىنىڭ پرەزيدەنتتى قاماۋعا الۋ ارەكەتىنە ونىڭ جەكە كۇزەت قىزمەتى كەدەرگى كەلتىرگەنى.
ەلدىڭ سىبايلاس جەمقورلىققا قارسى اگەنتتىگى قاۋىپسىزدىك قىزمەتىنىڭ پرەزيدەنتتىڭ رەزيدەنتسياسىنا بىرنەشە ساعات بويى تەرگەۋشىلەردى كىرگىزبەگەننەن كەيىن، ولاردىڭ قاۋىپسىزدىگىنە الاڭداپ، تەرگەۋشىلەرىن قايتارىپ العانىن مالىمدەدى.
سونىمەن قاتار، يۋن سوك ءيولدىڭ جاقتاستارى دا كوشەگە شىعىپ، ۇلتتىق اسسامبلەيا جاريالاعان يمپيچمەنتتى الىپ تاستاۋدى تالاپ ەتتى.
Yonhap اگەنتتىگىنىڭ دەرەكتەرىنە سۇيەنسەك، سەۋلدىڭ ورتالىعىنداعى كۆانحۆامۋن الاڭىندا شامامەن 35 000 ادام يۋندى قولداۋ ميتينگىسىنە قاتىسىپ، كەيىننەن يونسان اۋدانىنىڭ حاننام-دون ايماعىنا بارىپ، يۋنعا قارسى شىققان نارازىلىق بىلدىرۋشىلەرگە قارسىلىق كورسەتكەن.
400 مەتر قاشىقتىقتا كورەيانىڭ كاسىپوداقتار كونفەدەراتسياسىنىڭ (KCTU) مۇشەلەرى يۋندى دەرەۋ قاماۋعا الۋدى تالاپ ەتىپ، ميتينگ وتكىزگەن.
KCTU مۇشەلەرى يۋننىڭ رەزيدەنتسياسىنا جاقىنداماق بولعان، بىراق پوليتسيا ولاردى بوگەپ تاستادى. قاقتىعىس بارىسىندا پوليتسيا قىزمەتكەرلەرىنە شابۋىل جاسادى دەگەن ايىپپەن ەكى ادام ۇستالدى.
نارازىلىق بىلدىرۋشىلەر جولداردى جاۋىپ تاستاپ، ايماقتا كولىك قوزعالىسىنىڭ ايتارلىقتاي قيىنداۋىنا سەبەپ بولدى. سونداي-اق، سەۋلدەگى حانگاندجين ستانتسياسى ۋاقىتشا جابىلىپ، پويىزدار بۇل ستانتسياعا توقتاماي ءوتىپ جاتىر.
بيلىكتەن شەتتەتىلگەنىنە قاراماستان، يۋن سوك يول كەيبىر ارتىقشىلىقتارىن ساقتاپ قالىپ، ونىڭ ءىسى كونستيتۋتسيالىق سوتتا قارالعانشا، كۇزەت قىزمەتىنىڭ قورعاۋىندا بولماق.
ەسكە سالساق، 14 جەلتوقساندا وڭتۇستىك كورەيا پارلامەنتىنىڭ 300 دەپۋتاتىنىڭ 204-ءى يۋن سوك ءيولدى پرەزيدەنتتىك قىزمەتىنەن شەتتەتۋگە داۋىس بەرگەن بولاتىن. بۇل شەشىمگە ونىڭ ەلدە توتەنشە جاعداي ەنگىزۋى سەبەپ بولدى.
