ونەركاسىپ جانە قۇرىلىس ءمينيسترى قانات شارلاپاەۆ مەملەكەت باسشىسى قاسىم-جومارت توقاەۆقا قارسى شىقپايتىنىن ايتتى، دەپ حابارلايدى "ادىرنا" ۇلتتىق پورتالى.
ۇكىمەت وتىرىسىنان كەيىن جۋرناليستەر قانات بيسيمبايۇلىنا ۋتيلالىمعا بايلانىستى سۇراق قويدى. ارىپتەستەردىڭ ءبىرى «قوعامدا رەزونانس تۋعىزعان ماسەلەگە بايلانىستى پرەزيدەنت حالىقتىڭ تالابىن ەسكەرىپ، وڭ شەشىم شىعارادى. مىسالى، ۇكىمەت كيىك اتۋعا بايلانىستى شەشىم شىعارعان كەزدە حالىق وعان قارسى بولدى. جۋىردا پرەزيدەنت حالىقتىڭ تالابىن ەسكەرىپ، كيىك اتۋعا تىيىم سالدى. سول سەكىلدى ۋتيلسبورعا بايلانىستى قوعامنىڭ نارازىلىعى جوعارى. ەرتەڭ جولداۋدا نەمەسە باسقا دا ءبىر جاعدايدا پرەزيدەنت ۋتيلسبوردى الىپ تاستاۋ كەرەك دەسە ءسىز وعان قارسى شىعاسىز با؟» دەپ سۇرادى.
ءا
"وتە جاقسى سۇراق. ارينە، مەن پرەزيدەنتكە قارسى شىقپايمىن. بىراق ەڭ الدىمەن قازىرگى تاڭداعى ءسىز ايتىپ جاتقان حالىقتىڭ نارازىلىعىن جاقسى تۇسىنەمىز. الايدا باسقا قوعامنىڭ وكىلدەرىنىڭ پىكىرىن تىڭدامايمىز با؟ قازىرگى تاڭدا ونەركاسىپتى قورعاۋ ءۇشىن جاريالاعان پەتيتسيانى 10 مىڭنان استام ادام قولداپ جاتىر. ولاردىڭ پىكىرىن ەسكەرمەيمىز بە؟ ءبىرىنشى پەتيتسيانى زاڭ بويىنشا قاتىستىرامىز، ال ەكىنشى پەتيتسيا ەلۋ مىڭ داۋىسقا جەتسە ونى دا ەسكەرۋ قاجەت بولادى. مەنىڭ ويىمشا، پەتيتسيا ارقىلى ناقتى دەموكراتيا بەلگىلەرىن كورسەتىپ جاتىر. كوبىسى ءاۆتووندىرىستى قورعايمىز دەسە، ەندى ءبىرى ونەركاسىپكە قارسى شىعىپ جاتىرمىز دەپ ايتادى،" – دەدى مينيستر.
ءجۋرناليستىڭ «ياعني، پرەزيدەنت ۋتيلالىمدى الىپ تاستاسا ءسىز كەلىسەسىز عوي» دەگەن ناقتىلاي سۇراعىنا مينيستر «مەنىڭ ويىمشا، پرەزيدەنت تاراپىنان ەگەر وسىنداي شەشىم شىقسا، ەشكىم قارسى شىقپايدى. بىراق ءار ادامنىڭ پىكىرىن ەسكەرىپ جانە ناقتى دەموكراتيا پرينتسيپتەرىن ساقتاۋىمىز قاجەت،» - دەپ قىسقا جاۋاپ بەردى.
