قازاقستان مەن وزبەكستاندى بايلانىستىراتىن جاڭا تەمىرجول جەلىسى سالىنىپ جاتىر. بۇل تۋرالى «قازاقستان تەمىر جولى» كومپانياسىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى Kazinform اگەنتتىگىنە سىلتەپ.
اقپاراتقا سايكەس، قازاقستان مەن وزبەكستاندى بايلانىستىراتىن جاڭا تەمىرجول جەلىسى 2027 جىلى پايدالانۋعا بەرىلمەك.
«قازاقستان تەمىر جولى» كومپانياسىنىڭ ءباسپاسوز قىزمەتىنەن ءمالىم ەتكەندەي، جاڭا تەمىرجول جەلىسىن ىسكە قوسۋ «سارىاعاش» ستانتسياسىنىڭ جۇكتەمەسىن ازايتۋعا جانە وزبەكستانعا ەكسپورت كولەمىن ارتتىرۋعا مۇمكىندىك بەرەدى.
“بۇل ماقساتتا «قازاقستان تەمىر جولى» 286 ملرد تەڭگەگە ينۆەستيتسيالىق جوبانى جۇزەگە اسىرىپ جاتىر. داربازا-ماقتاارال جاڭا جەلىسى تۇركىستان وبلىسىنىڭ ەكى شالعاي اۋدانىن، اتاپ ايتقاندا ماقتاارال مەن جەتىسايدى قازاقستاننىڭ باسقا ايماقتارىمەن بايلانىستىرۋعا مۇمكىندىك بەرەدى. بۇگىنگى تاڭدا 203 شاقىرىم جولدىڭ شامامەن 100 شاقىرىمىنا رەلس-شپالدى تور توسەلدى”، — دەلىنگەن «قتج» كومپانياسى تاراتقان حابارلامادا.
جوباعا 46 تەحنيكا مەن 70-تەن استام ادام جۇمىلدىرىلعان. كومپانيادان اتاپ وتكەندەي، قۇرىلىس كەزەڭىندە 3 400 ۋاقىتشا جۇمىس ورنى قۇرىلادى. ال جەلى قولدانىسقا بەرىلەتىن 2027 جىلى 500-دەن استام تۇرعىن تۇراقتى جۇمىسپەن قامتىلادى.
