بۇگىن، 20 قىركۇيەك بۋداپەشتە (ۆەنگريا) ءوتىپ جاتقان شاحمات وليمپياداسىنىڭ سەگىزىنشى راۋندى اياقتالدى. قازاقستان قۇراماسى وليمپيادا ۇزدىكتەرىنىڭ قاتارىنا ەندى. بۇل تۋرالى قازاقستان شاحمات فەدەراتسياسى مالىمدەدى، دەپ حابارلايدى “ادىرنا” ۇلتتىق پورتالى.
قازاقستاننىڭ ايەلدەر قۇراماسى تۋرنير كەستەسىندە ءتورتىنشى ورىندا تۇرعان فرانتسيانىڭ ۇلتتىق كومانداسىمەن كەزدەستى. 8-ءشى راۋندتا قازاقستان اتىنان كەلەسى ويىنشىلار شىقتى: ءبيبىسارا اساۋباەۆا، مەرۋەرت كاماليدەنوۆا، امينا كايربەكوۆا جانە الۋا نۇرمان.
ءبىرىنشى پارتيادا مەرۋەرت كاماليدەنوۆا فرانتسيالىق سوفي ميلەمەن وينادى. فرانتسيا شاحماتشىسى ۇتتى.
كەلەسى ەكى پارتيادا كوماندا كاپيتانى ءبيبىسارا اساۋباەۆا دەيمانتا داۋليتە-كورنەتتى، الۋا نۇرمان پولينا گيشاردى جەڭدى. وسىلايشا ولار قۇراما قورجىنىنا 2 بالل قوستى.
سوڭعى پارتيادا امينا كايربەكوۆا مەن ناتاشا بەنمەسبا كەزدەسىپ، ويىن تەڭ اياقتالىپ، ەكى كومانداعا جارتى بالدان بەرىلدى.
ءتورت پارتيانىڭ قورىتىندىسى بويىنشا 2,5:1,5 ەسەبىمەن قازاقستان ۇلتتىق كومانداسى جەڭىسكە جەتىپ، ءۇندىستان، پولشا كوماندالارىمەن بىرگە ۇزدىكتەر قاتارىنا قوسىلدى.
توعىزىنشى راۋندتا قازاقستان قۇراماسى تۋرنير كەستەسىندە ەكىنشى تۇرعان پولشا كومانداسىمەن كەزدەسەدى.
