يلون ماسك اقش-تىڭ جاڭادان سايلانعان پرەزيدەنتى دونالد ترامپتىڭ جەكە رەزيدەنتسياسىنىڭ اۋماعىندا ورنالاسقان كوتتەدجدەردىڭ ءبىرىن جالعا العان، دەپ حابارلايدى "ادىرنا" ۇلتتىق پورتالى The New York Times-قا سىلتەمە جاساپ.
ماسك تۇرعان كوتتەدج Banyan دەپ اتالادى. ول نەگىزگى ۇيدەن بىرنەشە ءجۇز فۋت قاشىقتىقتا ورنالاسقان. رەزيدەنتسيا اۋماعىندا تۇرۋ ماسكقا ترامپ ۇيىمداستىرعان كەشكى استارعا قاتىسۋعا مۇمكىندىك بەرەدى.
ماسك مار-ا-لاگو اۋماعىندا تۇرعان جالعىز پرەزيدەنت سەرىكتەسى ەمەس. دەرەككوز مالىمەتىنشە، بولاشاق ۆيتسە-پرەزيدەنت دجەي دي ۆەنس تە وسى كوتتەدجدەردىڭ بىرىندە توقتاعان.
The New York Times مالىمەتىنشە، ترامپ الەمدەگى ەڭ باي ادام سانالاتىن ماسكتىڭ مار-ا-لاگونىڭ ءبىر تۇرعىن ءۇي ايماعىن «جالداپ جاتقانىن» ماقتان ەتكەن.
كوتتەدجدى جالداۋ قۇنى ادەتتە ءبىر تۇنگە كەمىندە 2000 دوللاردى (1 ملن 49 مىڭ تەڭگەنى) قۇرايتىنى ايتىلعانىمەن، ماسكتىڭ ناقتى قانشا تولەيتىنى بەلگىسىز. ادەتتە، قوناقتارعا شوت ولاردىڭ كەتەر كۇنى بەرىلەدى. سوندىقتان ترامپ ماسكقا شوتتى مۇلدەم ۇسىنباۋى نەمەسە جالداۋ قۇنىن ازايتۋى مۇمكىن دەگەن بولجام بار.
يلون ماسك كوتتەدجگە شامامەن سايلاۋ كۇنى ورنالاسىپ، سايلاۋ ناتيجەلەرىن ترامپپەن بىرگە باقىلاعان. ول روجدەستۆو مەرەكەسى قارساڭىندا اۋماقتان كەتكەنىمەن، جاقىن كۇندەرى قايتا ورالادى دەپ كۇتىلۋدە دەپ جازدى New York Times.
ەسكە سالا كەتسەك، 20 قاڭتاردا دونالد ترامپ اقش-تىڭ 47 پرەزيدەنتى رەتىندە ۇلىقتاۋ ءراسىمىن وتكىزىپ، قىزمەتىنە كىرىسپەك.
