كانادا مەن نورۆەگيادا اۋەدە اپاتتى جاعداي ورىن الىپ، ەكى وقيعا دا ادام شىعىنىنسىز اياقتالدى، دەپ حابارلايدى "ادىرنا" ۇلتتىق پورتالى.
28 جەلتوقسان كۇنى كەشكە كانادانىڭ گاليفاكس قالاسىنداعى اۋەجايدا سەنت-دجونس قالاسىنان كەلگەن Air Canada كومپانياسىنىڭ 2259 رەيسى شاسسي اقاۋىنا بايلانىستى ۇشۋ-قونۋ جولاعىنان سىرعىپ، ءبىر بولىگى ورتەنىپ كەتتى.
ۇشاقتاعى جولاۋشىلاردىڭ ءبىرى نيككي ۆالەنتايننىڭ ايتۋىنشا، قونۋ كەزىندە ءشاسسيدىڭ ءبىرى دۇرىس اشىلماعان. بۇل ۇشاقتىڭ سولعا قاراي 20 گرادۋسقا ەڭكەيىپ، قاناتىنىڭ تروتۋارعا ءتيىپ كەتۋىنە سەبەپ بولعان. ۇشاق ۇزاق قاشىقتىققا سىرعىپ بارىپ توقتاعان.
وقيعادان كەيىن بورتتاعى شامامەن 80 ادام ەۆاكۋاتسيالاندى. اۋەجاي اكىمشىلىگى وقيعادان قازا تاپقاندار جوق ەكەنىن حابارلادى. دەگەنمەن، جاراقات العاندار بار. ولاردىڭ ناقتى سانى ازىرگە بەلگىسىز.
ەكىنشى وقيعا نورۆەگيادا ورىن الدى. وسلو قالاسىنان امستەردامعا باعىت العان KLM اۆياكومپانياسىنىڭ Boeing 737 ۇشاعى 29 جەلتوقسان كۇنى كەشكە تەحنيكالىق اقاۋعا بايلانىستى وڭتۇستىك نورۆەگياداعى تورپ ساندەفورد اۋەجايىنا شۇعىل قوندى.
ۇشاق بورتىندا بولعان 182 ادامنىڭ بارلىعى امان. ۇشۋ كەزىندە جولاۋشىلار سول جاق قوزعالتقىشتان شىققان قاتتى دىبىس پەن ءتۇتىندى بايقاپ، پيلوتتار قونۋعا شەشىم قابىلداعان.
قونۋ كەزىندە ۇشاق باسقارىلماي، ۇشۋ-قونۋ جولاعىنان اسىپ كەتىپ، شوپكە توقتاعان.
ەكى وقيعا دا ادام شىعىنىسىز اياقتالدى. الايدا ماماندار اۋە كەمەلەرىندەگى تەحنيكالىق اقاۋلارعا قاتىستى تەرگەۋدى باستادى.
