قازاقستان پرەمەر-ءمينيسترىنىڭ ورىنباسارى، ۇكىمەتتىك كوميسسيانىڭ توراعاسى قانات بوزىمباەۆ اقتاۋ ماڭىنداعى اۋە اپاتىن تەرگەۋ بويىنشا قازاقستانعا سىرتتان قىسىم كورسەتىلىپ جاتىر دەگەن اقپاراتتى جوققا شىعاردى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
«بۇل – جالعان اقپارات. ەشقانداي ەل بۇل وقيعانىڭ ءمان-جايىن انىقتاۋ پروتسەسىنە ارالاسۋعا تىرىسىپ جاتقان جوق. ءبىز بۇل تۇرعىدا ەشقانداي ماسەلە كورىپ تۇرعان جوقپىز»، – دەدى بوزىمباەۆ.
ونىڭ ايتۋىنشا، قازاقستان تەرگەۋگە مۇددەلى ەلدەردىڭ بارلىعىن قاتىستىرۋدى قامتاماسىز ەتكەن.
«بۇل ەڭ الدىمەن ءۇش ەل. ولار - ازەربايجان، رەسەي فەدەراتسياسى جانە برازيليا ( ۇشاقتى ءوندىرۋشى ەل). قازىر 17 جۇمىس ىستەپ جاتىر. قىسىم كورسەتۋدىڭ ءمانى جوق. سونىمەن قاتار، قازاقستان 1992 جىلدان باستاپ چيكاگو كونۆەنتسياسىنىڭ مۇشەسى بولىپ تابىلادى. كونۆەنتسياعا سايكەس، كەز كەلگەن اۆياتسيالىق تەرگەۋ جۇرگىزۋ شەشىمىن تەرگەۋ جۇرگىزەتىن ەل قابىلدايدى. ياعني، تەك ءبىز كىمدەردى تارتۋ، كىممەن جۇمىس ىستەۋ جانە تاعى باسقالارىن ءوز بەتىمىزشە شەشەمىز. بۇل قوعامدا ەشقانداي سۇراق تۋىنداماۋى ءۇشىن قاجەت»، – دەدى پرەمەر-ءمينيستردىڭ ورىنباسارى.
سونداي-اق، قانات بوزىمباەۆ ۇشاق اپاتىندا قازا تاپقانداردىڭ كەيبىرىنىڭ دەنەسى ءالى انىقتالماعانىن ايتتى.
2024 جىلعى 25 جەلتوقساندا اقتاۋ ماڭىندا Azerbaijan Airlines اۋە كومپانياسىنىڭ باكۋ (ازەربايجان) – گروزنىي (رەسەي) باعىتىندا AHY8243 رەيسىمەن ۇشىپ بارا جاتقان جولاۋشىلار ۇشاعى اپاتقا ۇشىراعان بولاتىن. اۋە رەيسى استانا ۋاقىتىمەن ساعات 08:49-دا باكۋ اۋەجايىنان جوسپارلانعان ۋاقىتتان 11 مينۋت ەرتە ۇشىپ شىققان. گروزنىيدا قالىڭ تۇمان بولعاندىقتان، ۇشاق الدىمەن ماحاچقالاعا، كەيىن اقتاۋعا باعىتتالعان. كاسپي تەڭىزى ۇستىندە ەكيپاج «توتەنشە جاعداي» سيگنالىن جىبەرىپ، شۇعىل قونۋعا سۇرانىس جاساعان. اقتاۋ اۋەجايى ۇشاقتى قابىلداۋعا دايىندالىپ جاتقاندا، ساعات 11:30-دا ۇشاق اۋەجايدان 3 شاقىرىم جەردە قۇلادى.
رەسمي اپات سەبەبى ازىرگە بەلگىسىز. ءار ءتۇرلى بولجامدار ايتىلۋدا. قارا جاشىك سول كۇنى كەشكە تابىلدى، ەندى ماماندار ونىڭ دەرەكتەرىن راسشيفروۆكا جاسايدى.
