24 جەلتوقسان كۇنى كەشكە الماتىدا Grand Park ساۋدا-ويىن-ساۋىق ورتالىعىنىڭ جانىندا اتىس بولدى، دەپ حابارلايدى "ادىرنا" ۇلتتىق پورتالى. بۇل تۋرالى كۋاگەرلەر الەۋمەتتىك جەلىلەردە جازدى.
"گراند پاركتىڭ" جانىندا اتىس بولدى. جاراقات العاندار بار. پوليتسيا مەن جەدەل جاردەم قىزمەتكەرلەرى كەلدى", – دەپ جازدى وقيعا كۋاگەرلەرىنىڭ ءبىرى.
الماتى قالاسى پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، 102 پۋلتىنە قابدولوۆ كوشەسىندە وق اتىلعانى تۋرالى حابارلاما تۇسكەن.
"پاترۋلدىك پوليتسيا قىزمەتكەرلەرى 18 جاستاعى ەر ادامدى دەرەۋ ۇستادى. ودان سيگنالدى تاپانشا تابىلىپ، تاركىلەندى. اۋەزوۆ اۋداندىق پوليتسيا باسقارماسى بۇل وقيعا بويىنشا بۇزاقىلىق فاكتىسىمەن قىلمىستىق ءىس قوزعادى", – دەپ حابارلادى ۆەدومستۆو.
ەسكە سالا كەتەيىك، 20 جەلتوقسان كۇنى دە الماتىدا ناۋرىزباي اۋدانىنداعى تۇرعىن ءۇي كەشەنىندە اتىس ورىن العان ەدى. بەلگىسىز ەر ادام پاتەرگە باسا-كوكتەپ كىرىپ، ەكى ادامعا وق اتقان. پوليتسيا قىزمەتكەرلەرى كۇدىكتىنى ىزدەپ جاتقانىن مالىمدەگەن بولاتىن.
