پوليتسەي بولىپ جۇمىس ىستەگەن كۇيەۋىنەن زورلىق-زومبىلىق كورگەن "قازاقستاندىق تۇراقتىلىق قورى" اق سىرتقى كوممۋنيكاتسيالار قىزمەتىنىڭ باسشىسى شىنار جانىبەكوۆا شىندىعىن ايتتى. ول الەۋمەتتىك جەلىدەگى پاراقشاسىندا مالىمدەدى، دەپ حابارلايدى “ادىرنا” ۇلتتىق پورتالى.
ايەلدىڭ ايتۋىنشا، ول ەلىمىزدە تۇرمىستىق زورلىق-زومبىلىققا قارسى قابىلدانعان جاڭا زاڭعا سەنىپ، كۇيەۋىنىڭ ۇستىنەن ارىز جازعان. الايدا ونىڭ پوليتسيا قىزمەتكەرلەرىنىڭ ءىس-ارەكەتىنە كوڭىلى تولماعان.
"ەندى تۇرمىستىق زورلىق-زومبىلىقتان كەيىن ايەلدى نە كۇتىپ تۇرعانىن ايتىپ بەرەيىن.
8 مامىردا كۇيەۋىم ماعان تاعى دا قول كوتەردى. مەن زاڭ ايەلدىڭ جاعىندا دەگەندە سەنگەندىكتەن، پوليتسيا شاقىردىم.
سول كۇنى كۇيەۋىم ارتىمنان قۋدى، مەن جالاڭاياق كوشەگە شىعىپ كەتتىم. ول مەنى قۇلاتىپ، تەپكىلەي باستادى. مەن ادامداردى كومەككە شاقىرىپ، ايعايلادىم. قورقىنىشتان با، نە قاتتى ايقايلاعانىمنان با، دارەتىمدى جىبەرىپ قويدىم. مۇنى كورگەن كىشى ۇلىم دا ايعايلاي باستادى. شاماسى، ۇلىمنىڭ ايعايلاعانى كۇيەۋىمدى توقتاتتى ما، ول ۇيگە كەتىپ قالدى. ۇلىم ەكەۋمىز كورشىلەرىمىزگە قاشىپ كەتتىك. سول جەردەن پوليتسيا شاقىردىق.
مەن كەلگەن پوليتسياعا پيجامامەن، جالاڭاياق، اقساڭداپ شىقتىم. وسى ۋاقىتتا ولار كوشەدە كۇيەۋىممەن سويلەسىپ تۇردى. ولار مەنەن اياق كيىم كيۋىمدى سۇرادى. مەن ولاردىڭ ارمەن قارايعى ءىس-ارەكەتى قانداي بولاتىنىن سۇراپ، كۇيەۋىمنىڭ ۇستىنەن ارىز جازعىم كەلەتىنىن ايتتىم. وسىدان كەيىن عانا ولار بولىمشەگە بارامىز دەپ جاۋاپ بەردى. مەن كيىمىمدى اۋىستىرىپ، سىرتقا شىقتىم”، دەپ جازدى ول.
سونداي-اق، شىنار پوليتسەيلەردى ەكەۋىن قوسقىسى كەلىپ، ىسكە بەي-جاي قاراعانىن ايتادى.
«كۇيەۋىم ماعان توقتايتىن كەز كەلگەنىن ايتىپ، "جالعاستىرعىڭ كەلە مە؟" دەپ سۇرادى. مەن ء"يا، ارىز جازعىم كەلەدى" دەدىم. پوليتسەي ماعان اۋداندىق ىشكى ىستەر بولىمىنە بارعانشا ۇندەمەۋىمدى سۇراپ، كولىككە وتىرعىزدى. مەن كۇيەۋىمنىڭ قاسىندا وتىرۋدان باس تارتتىم. وسىدان كەيىن ولار ماعان الدىڭعى ورىندىققا وتىرۋدى ۇسىندى.
مەن پوليتسەيدەن كۇيەۋىم مەنەن ۇيدە تارتىپ العان ۇيالى تەلەفونىمدى قاشان بەرەتىنىن سۇرادىم. پوليتسەي ماعان "بولىمشەدە شەشەمىز" دەپ جاۋاپ قاتتى. نەگىزى ۇيالى تەلەفون كۇيەۋىمنىڭ قولىندا ەدى.
جولدا كۇيەۋىم مەنى اڭگىمەگە تارتتى، مەن ۇندەمەي وتىرا بەردىم، ال پوليتسەي وعان ەسكەرتۋ جاساعان جوق. بىراق بۇعان دەيىن مەنەن ۇندەمەۋدى سۇراعان بولاتىن. مەن پوليتسەيدىڭ نەگە كۇيەۋىمە ەسكەرتۋ جاسامايتىنىن سۇرامايىنشا، ول دا ۇندەمەي وتىرا بەردى. بولىمشەگە بارعاننان كەيىن ولار ماعان كۇيەۋىممەن بىرگە كامەراعا كىرۋدى بۇيىردى. مەن باس تارتىپ، ونىمەن ءبىر جەرگە وتىرمايتىنىمدى ايتتىم. وسىدان كەيىن عانا ولار ءبىزدى ءارتۇرلى بولمەگە وتىرعىزدى.
مەن ارىز جازدىم دا، پوليتسەيلەردەن ولاردىڭ ەندى نە ىستەيتىنىن سۇرادىم. ولار ماعان ءىستىڭ ءمان-جايىن تۇسىندىرۋگە قاقىلارى جوق ەكەنىن ايتىپ، ەشنارسەنى اشىپ ايتپادى. ماعان ءبارىن كەيىن حابارلاساتىن ۋچاسكەلىك پوليتسيا قىزمەتكەرى تۇسىندىرەتىنىن ايتتى. كۇيەۋىمدى 3 ساعات قانا بولىمشەدە ۇستاپ، كەيىن جىبەردى. كەلەسى كۇنى كۇيەۋىم اتا-اناسىمەن بىرگە كەلدى، مەن ولاردى كىرگىزبەدىم.
مەن ءوز ەموتسيامدى سيپاتتاي المايمىن. مۇنى تەك تۇرمىستىق زورلىق-زومبىلىق كورگەن ايەل تۇسىنەدى. ەگەر ەكەۋمىز ءبىر جەردە قالاتىن بولساق، ول مەنى ءولتىرىپ قويادى”، - دەپ جازدى ايەل.
ۋچاسكەلىك پوليتسەي 4 كۇننەن كەيىن تەك جەكسەنبى كۇنى قوڭىراۋ شالىپ، وعان كەلە جاتقانىن ايتقان.
«ماعان 30 كۇن ىشىندە كۇيەۋىم ەكەۋمىز ءبىر-بىرىمىزگە قوڭىراۋ شالۋعا، جازۋعا، سويلەسۋگە تىيىم سالىناتىنى تۋرالى قاعازعا قول قويۋعا بەردى. ال 30 كۇننەن كەيىن كۇيەۋىم ۇيگە قايتىپ كەلەدى، ال مەن بۇعان كەدەرگى بولا المايمىن. ال كەدەرگى بولۋعا تىرىساتىن بولسام، مەنى جاۋاپكەرشىلىككە تارتادى، ءتىپتى ايىپپۇل تولەيمىن. مەن پوليتسيا قىزمەتكەرلەرىن كۇيەۋىم مەنى قايتادان قورقىتسا نەمەسە قول كوتەرسە عانا شاقىرا الامىن، بىراق شاقىرۋ ءۇشىن مەنىڭ قولىمدا فوتو نەمەسە ۆيدەو تۇرىندە دالەل بولۋى شارت. ايتپەسە جالعان قوڭىراۋ ءۇشىن مەن ايىپپۇل تولەيمىن.
ءسويتىپ پوليتسەي ماعان مەديتسينالىق كۋالاندىرۋعا جولداما بەردى. ول ءۇشىن مەن ءموردى قالانىڭ ءبىر شەتىنەن قويعىزىپ، كۋالاندىرۋ ءۇشىن قالانىڭ ەكىنشى شەتىنە بارۋىم كەرەك. سونداي-اق، ول مەنىڭ ءىستى قانشالىق سوتقا دەيىن جەتكىزگىم كەلەتىنىن سۇرادى دا، بۇل بالالارعا اسەر ەتەتىنىن، بولاشاقتا ولاردىڭ جۇمىسقا ورنالاسۋىنا كەدەرگى كەلتىرەتىنىن، دەرەكتەرىندە اكەسى سوتتالعانى جازىلىپ تۇراتىنىن ايتتى.
سونىمەن قاتار، پوليتسەي كۇيەۋىمنىڭ بۇرىنعى قىزمەتكەر ەكەنىنە نازار اۋداردى. مەنىڭ مۇنىڭ بارىمەن قانشالىق بايلانىسقىم كەلەتىنىن سۇرادى. سودان كەيىن ول كۇيەۋىمدى شاقىرىپ، وزىنە قارۋدى تاپسىرۋىن سۇرادى. كۇيەۋىم ءىىم-ءنىڭ بۇرىنعى قىزمەتكەرى بولعان اكەسىمەن بىرگە كەلدى.
قورىتىندىنى ءوزىڭىز جاساڭىز. ايەل قۇقىعى شىنىمەن قورعالعان با؟ ايەلدەرگە بىرجاقتى كوزقاراس بار ما؟ ايەل ءوزىن قورعاي الا ما؟
مەنىڭ جوسپارىم بار. مەن ونى بولىسە الامىن.
ال سۋرەتتەگى مەن، سۋرەتتەن مەنىڭ اياعىمنىڭ سىنعانىن كورۋگە بولادى. بۇل كەزدە اياعىمدى كۇيەۋىم سىندىرعان بولاتىن. سۋرەتتە مەن كۇلىپ تۇرمىن، الايدا ەشكىم اياعىمنىڭ نەلىكتەن سىنعانىن بىلمەيدى. مەن ەشكىمگە ايتقان جوقپىن. نەگە كۇلىپ تۇرمىن؟ ايەل ارقاشان جاقسى كوڭىل-كۇيدە بولۋى كەرەك، ۇرىس شىعارماي، ءبارىن ىشىندە ۇستاۋى كەرەك", - دەدى ايەل.
