الماتىدا اۋىل بالالارىنا ارنالعان «AUYL SPORT-2024» رەسپۋبليكالىق ليگاسى باستالدى، دەپ حابارلايدى "ادىرنا" ۇلتتىق پورتالى.
بۇگىن، 21 جەلتوقساندا الماتى قالاسىنداعى «دوستىق» سپورت كەشەنىندە اۋىل بالالارىنىڭ قاتىسۋىمەن «AUYL SPORT-2024» رەسپۋبليكالىق ليگاسىنىڭ اشىلۋ سالتاناتى ءوتتى. اۋقىمدى شاراعا ەلىمىزدىڭ ءار وڭىرىنەن 1300-دەن استام جاس سپورتشى جينالدى.
جوبانىڭ باس دەمەۋشىسى ءارى ۇيىمداستىرۋشىسى – «حالىق» قايىرىمدىلىق قورى. سەرىكتەستەر قاتارىندا قازاق سپورت جانە تۋريزم اكادەمياسى، قر وقۋ-اعارتۋ مينيسترلىگى، ۇلتتىق عىلىمي-پراكتيكالىق دەنە تاربيەسى ورتالىعى جانە الماتى قالاسى سپورت باسقارماسى بار.
«AUYL SPORT» جوباسى 2023 جىلدىڭ قازان ايىندا «حالىق» قورىنىڭ باستاماسىمەن قولعا الىنىپ، اۋىل جاستارىنىڭ سپورتقا قىزىعۋشىلىعىن ارتتىرۋدى، سپورتتى ناسيحاتتاۋدى جانە اۋىلدىق جەرلەردە بۇقارالىق سپورتتى دامىتۋدى ماقسات ەتەدى. سونىمەن قاتار، جوبا اۋىلدىق جاتتىقتىرۋشىلاردىڭ بىلىكتىلىگىن ارتتىرۋعا باعىتتالعان.
رەسپۋبليكالىق ليگادا بوكس، ەركىن كۇرەس، كاراتە، باسكەتبول، ۆولەيبول جانە شاحماتتان سايىستار وتكىزىلەدى. بۇل جارىستارعا ەلىمىزدىڭ 17 وبلىسىندا وتكەن وڭىرلىك ليگانىڭ جەڭىمپازدارى قاتىسۋدا. تۋرنير قۇرىلىمى:
- ەركىن كۇرەس پەن بوكس – 2010-2012 جىلى تۋعان بالالار اراسىندا 6 سالماق دارەجەسى;
- باسكەتبول جانە ۆولەيبول – 2009-2011 جىلى تۋعان قىزدار مەن ۇلدار كوماندالارى اراسىندا;
- شاحمات – 10 جاسقا دەيىنگى جانە 14 جاسقا دەيىنگى ۇلدار مەن قىزدار اراسىندا.
وڭىرلىك ليگالاردا 200-دەن استام اۋىلدىڭ 7000-عا جۋىق بالاسى مەن ءجاسوسپىرىمى باق سىنادى.
اشىلۋ سالتاناتىندا قاتىسۋشىلار مەن قوناقتاردى «حالىق بانك» اق باسقارما توراعاسى ءۇمىت شاياحمەتوۆا قۇتتىقتاپ، جوبانىڭ اۋىل جاستارىن قولداۋداعى ماڭىزدىلىعىن اتاپ ءوتتى.
«سپورت تەك دەنساۋلىقتىڭ كەپىلى ەمەس، سونداي-اق بولاشاق چەمپيونداردى تاربيەلەيتىن ورتا. ءبىز اۋىلدىق جەرلەردە سپورتتى دامىتا وتىرىپ، ۇلتتىڭ بولاشاعىنا ينۆەستيتسيا سالامىز»، – دەدى ءۇمىت شاياحمەتوۆا.
شاراعا وليمپيادا چەمپيوندارى ەرماحان يبرايموۆ پەن نۇرباقىت تەڭىزباەۆ قۇرمەتتى قوناق رەتىندە قاتىستى. ولار جاس سپورتشىلارمەن كەزدەسىپ، ءوز تاجىريبەلەرىمەن ءبولىستى.
مەرەكەلىك اتموسفەرانى كوتەرۋ ماقساتىندا پاتريوتتىق اندەر شىرقالىپ، ۇلتتىق بيلەر ورىندالدى. سونىمەن قاتار، قاجىمۇقان مۇڭايتپاسۇلىنىڭ ومىرىنە ارنالعان قويىلىم جاس سپورتشىلارعا رۋح بەرىپ، ەرەكشە سەزىم سىيلادى.
«AUYL SPORT» جوباسى – «حالىق» قورىنىڭ بالالار مەن جاسوسپىرىمدەردى قولداۋعا جانە اۋىلدىق سپورتتى دامىتۋعا باعىتتالعان ماڭىزدى باستامالارىنىڭ ءبىرى. قور بۇعان دەيىن وسى سالاعا 500 ميلليون تەڭگەگە جۋىق قارجى ءبولىپ، 120-دان استام الەۋمەتتىك جوبانى جۇزەگە اسىردى.
