20 جەلتوقسان كۇنى كەشكە گەرمانيانىڭ ساكسونيا-انحالت فەدەرالدى شتاتىنداعى ماگدەبۋرگ قالاسىنداعى روجدەستۆو بازارىندا قايعىلى وقيعا ورىن العان بولاتىن. قارا BMW كولىگىنىڭ جۇرگىزۋشىسى بازارعا سوقتىعىسىپ، ادامداردى قاعىپ وتكەن. كۇدىكتىنىڭ كىم ەكەنى انىقتالدى، دەپ حابارلايدى "ادىرنا" ۇلتتىق پورتالى.
DW باسىلىمىنىڭ حابارلاۋىنشا، كولىك ساۋدا الاڭىنا تولىق جىلدامدىقپەن كىرىپ، 400 مەتر ءجۇرىپ، جولىنداعى ادامداردى قاققان. وقيعا ورنىندا پوليتسەيلەر كولىكتى توقتاتىپ، كۇدىكتىنى ۇستادى.
شابۋىل جاساعان ازامات – 1974 جىلى تۋعان ساۋد ارابياسىنىڭ تۋماسى. ول گەرمانياعا 2006 جىلى كوشىپ كەلىپ، ساياسي بوسقىن مارتەبەسىن العان. كۇدىكتى دارىگەر بولىپ جۇمىس ىستەگەن جانە بەرنبۋرگ قالاسىندا تۇرعان. ساۋد ارابياسىنداعى دەرەككوزدەرىنە سۇيەنسەك، بۇل ازاماتتىڭ ەكسترەميستىك مازمۇنداعى جازبالار قالدىرعانى تۋرالى اقپارات گەرمانيا بيلىگىنە بەرىلگەن.
گەرمانيا كانتسلەرى ولاف شولتس قايتىس بولعانداردىڭ وتباسىلارىنا كوڭىل ايتىپ، وقيعا ورنىنا دەر كەزىندە كومەك كورسەتكەن قۇتقارۋشىلارعا العىس ءبىلدىردى. ناتو باس حاتشىسى مارك ريۋتتە كانتسلەر شولتسپەن بايلانىسىپ، ۇيىمنىڭ گەرمانياعا قولداۋ كورسەتۋگە دايىن ەكەنىن جەتكىزدى. قازاقستان پرەزيدەنتى قاسىم-جومارت توقاەۆ گەرمانيا پرەزيدەنتى فرانك-ۆالتەر شتاينمايەرگە كوڭىل ايتتى.
