قازاقستاننىڭ مەملەكەتتىك كەڭەسشىسى ەرلان قاريننىڭ قىتاي ساپارى كەزىندە جەنمين ۋنيۆەرسيتەتىندەگى بايانداماسى قىتايلىق قوعامدا قىزۋ پىكىرتالاس تۋدىردى، دەپ حابارلايدى "ادىرنا" ۇلتتىق پورتالى.
22 قاراشادا ەرلان قارين «قازاقستاننىڭ رەفورماسى جانە قىتاي-قازاقستان تۇراقتى جان-جاقتى ستراتەگيالىق ارىپتەستىگى» تاقىرىبىندا ءدارىس وقىدى. ءدارىس سوڭىندا قىتاي مەملەكەتتىك كەڭەسى دامۋدى زەرتتەۋ ورتالىعىنىڭ مامانى، رەسەيتانۋشى عالىم ۆان سيانجۋ قويعان سۇراق وقىرماندار اراسىندا كەڭ تالقىلانىپ، عالىمنىڭ ءوزى سىننىڭ استىندا قالدى.
ۆان سيانجۋ قازاقستانداعى بالا تۋ كورسەتكىشىنە تاڭدانىسىن بىلدىرە وتىرىپ، ءوز ەلىندە ايەلدەردىڭ تۇرمىسقا شىعۋعا جانە بالا تۋعا قۇلىقسىز ەكەنىن اتاپ ءوتتى.
«قازاقستاندا بارلىق جەردە بالالاردى كوردىم. بۇل مەملەكەتىڭىزدىڭ قولداۋ ساياساتىنىڭ ناتيجەسى بولۋى مۇمكىن. ال قىتايدا ايەلدەر بالا تۋعا ىنتاسىز. ولاردى ۇلكەندەر دە، باسشىلار دا كوندىرە المايدى. قازاقستاندا ايەلدەردى ەرتە ءارى كوپ بالالى بولۋعا قالاي كوندىرەسىزدەر؟»، - دەپ سۇراق قويعان.
بۇل سوزدەر الەۋمەتتىك جەلىدە قىزۋ تالقىعا ءتۇسىپ، قىتايلىق ايەلدەردىڭ نارازىلىعىن تۋدىردى.
ال قر مەملەكەتتىك كەڭەسشى ەرلان قارين ايەلدەردى ەشقاشان ماجبۇرلەۋگە بولمايتىنىن كەسىپ ايتتى. ول قازاقستانداعى ايەلدەردىڭ قۇقىقتارى، ادام قۇقىعىن قورعاۋ جانە بالالار قاۋىپسىزدىگى ماسەلەلەرىندە ماڭىزدى رەفورمالار جاسالعانىن اتاپ ءوتتى. سونىمەن قاتار، ول قازاقستانداعى ۇلتتىق قوردان جاڭا تۋعان ءاربىر بالاعا ديۆيدەند بولىنەتىنىن، بۇل مەحانيزم ەلدەگى الەۋمەتتىك قولداۋدىڭ ماڭىزدى قۇرالى ەكەنىن جەتكىزدى.
بۇل ديالوگ قىتايلىق ينتەرنەتتە ۇلكەن پىكىرتالاس تۋدىردى. كەيبىر قولدانۋشىلار ەرلان قاريننىڭ جاۋابىن جوعارى باعالاپ، ونى وركەنيەتتى جانە باتىل دەپ اتادى.
70 جاستاعى ۆان سيانجۋ رەسەي جانە ورتالىق ازيا ماسەلەلەرى بويىنشا ساراپشى. الايدا بۇل وقيعا ونىڭ بەدەلىنە سىزات ءتۇسىردى. قىتايدىڭ جەنمين ۋنيۆەرسيتەتى وقيعادان كەيىن بۇل سۇحباتتى ءوز سايتىنان ءوشىرىپ تاستادى.
