ۋكراينا پرەزيدەنتى ۆلاديمير زەلەنسكي 8 جەلتوقساندا Telegram ارناسىندا رەسەيدىڭ ۋكرايناعا قارسى كەڭ اۋقىمدى سوعىسى باستالعالى 43 مىڭ ۋكراينالىق ساربازدىڭ قازا تاپقانىن مالىمدەدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
ونىڭ ايتۋىنشا 370 مىڭ اسكەري قىزمەتكەر جاراقات العان. زەلەنسكيدىڭ ايتۋىنشا، جارالانعانداردىڭ شامامەن 50 پايىزى قايتادان ساپقا ورالادى.
زەلەنسكي رەسەي ارمياسىنىڭ شىعىنى تۋرالى دا اقپارات بەردى.
"ۋكراينا قارۋلى كۇشتەرى باس شتابىنىڭ جاڭارتىلعان دەرەكتەرىنە سايكەس، رەسەيلىك اسكەردىڭ شىعىنى 750 مىڭ ادامنان اسىپ كەتتى. ونىڭ ىشىندە 198 مىڭ رەسەيلىك قازا تاپقان، ال 550 مىڭنان استامى جاراقات العان", – دەپ اتاپ ءوتتى زەلەنسكي.
ول سونداي-اق قىركۇيەك ايىنان بەرى رەسەي مايداندا ادام شىعىنى بويىنشا 5 ەسە، كەيدە 6 ەسە كوپ شىعىنعا ۇشىراۋدا دەپ قوستى. ۋكراينا پرەزيدەنتى ۋكراينا مەن رەسەي ارميالارى اراسىنداعى باستى ايىرماشىلىقتاردىڭ ءبىرى رەتىندە فرونتتىق مەديتسينانىڭ دامۋ دەڭگەيىن اتاپ ءوتىپ، بۇل كورسەتكىشتىڭ ۋكراينادا ايتارلىقتاي جوعارى ەكەنىن ايتتى.
زەلەنسكي سونداي-اق 2014 جىلدان بەرى رەسەي تۇتقىنىندا قالعان مىڭداعان ادامداردى، سونىڭ ىشىندە اسكەري جانە بەيبىت تۇرعىنداردى ەسكە سالدى.
"2022 جىلدىڭ 24 اقپانىنان بەرى ءبىز رەسەيدەن 3935 ادامىمىزدى قايتاردىق: ولاردىڭ 3767-ءسى اسكەري، 168-ءى بەيبىت تۇرعىندار. ءبىز بارلىعىن قايتارۋىمىز كەرەك، بۇل ءالى دە ۇلكەن جۇمىس", – دەلىنگەن حابارلامادا.
سونىمەن قاتار، ۋكراينا پرەزيدەنتى رەسەيگە زاڭسىز دەپورتاتسيالانعان جۇزدەگەن مىڭ بالالار مەن رەسەي باسىپ العان ۋكراين جەرىندە كەم دەگەندە بىرنەشە ميلليون ادام قالعانى تۋرالى جازدى.
بۇعان دەيىن، اقش-تىڭ جاڭا سايلانعان پرەزيدەنتى دونالد ترامپتىڭ ۋكراينا پرەزيدەنتى ۆلاديمير زەلەنسكيدىڭ ماسكەۋمەن "كەلىسىمگە كەلگىسى" كەلەتىنىن مالىمدەگەنى تۋرالى جازعان ەدىك.
ترامپ سوعىس سالدارىنان جازىقسىز ادامداردىڭ جاپا شەگىپ جاتقانىن ايتتى. ونىڭ باعالاۋىنشا،سونداي-اق، ول سوعىستا قازا تاپقان نەمەسە جارالانعان رەسەيلىك ساربازداردىڭ سانى 600 مىڭعا جۋىق ەكەنىن، ال ۋكراينا قارۋلى كۇشتەرىنىڭ شىعىنىنىڭ 400 مىڭ ادامعا جەتكەنىن جازدى.
