7 جەلتوقسان كۇنى پاريجدەگى نوتر-دام شىركەۋى 2019 جىلدىڭ ءساۋىر ايىندا بولعان ۇلكەن ءورتتىڭ سالدارىنان بەس جىلدىق قالپىنا كەلتىرۋدەن كەيىن قايتا اشىلدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
بۇل وقيعاعا ارنالعان سالتاناتتى شاراعا قاتىسۋ ءۇشىن فرانتسيا استاناسىنا 40-تان استام مەملەكەت جانە ۇكىمەت باسشىلارى كەلدى. ولاردىڭ اراسىندا گەرمانيا پرەزيدەنتى فرانك-ۆالتەر شتاينمايەر، اقش-تىڭ سايلانعان پرەزيدەنتى دونالد ترامپ جانە ونىڭ سايلاۋ ناۋقانىنداعى سەرىگى يلون ماسك، ۇلىبريتانيانىڭ حانزاداسى ۋيليام جانە ۋكراينا پرەزيدەنتى ۆلاديمير زەلەنسكي بولدى.
سونىمەن قاتار سالتاناتتى شاراعا ءدىن قايراتكەرلەرى مەن قالپىنا كەلتىرۋ جۇمىستارىنا قارجىلاي كومەك كورسەتكەندەر دە شاقىرىلدى. شىركەۋدىڭ قايتادان سەنۋشىلەردى قابىلداۋعا دايىن ەكەندىگىن ءپاريجدىڭ ارحيەپيسكوپى لوران يۋلريش حابارلادى. بۇعان دەيىن ول ەسىكتەردى تاياعىمەن سوققان ەدى.
نوتر-دامنىڭ قايتا اشىلۋىنا ارنالعان مەرەكەلەر 7 جانە 8 جەلتوقسانداعى دەمالىس كۇندەرى جالعاستى. اشىلۋ سالتاناتىنىڭ ترانسلياتسياسىن 20-دان استام ەلدىڭ تەلەارنالارى كورسەتتى.
7 جەلتوقسانداعى كەشكى باعدارلامادا ورتتەن كەيىنگى وقيعالاردى باياندايتىن فيلم كورسەتىلىپ، قۇتقارۋشىلار مەن شىركەۋدى قالپىنا كەلتىرۋشى قۇرىلىسشىلارعا قۇرمەت كورسەتىلدى. قولايسىز اۋا رايىنا بايلانىستى بارلىق قويىلىمدار عيماراتتىڭ ىشىنە كوشىرىلدى.
2019 جىلى ورتپەن كۇرەسىپ، ونىڭ سالدارىن جويعان ءورت سوندىرۋشىلەر مەن قۇتقارۋشىلاردى، سونداي-اق قۇرىلىسشىلاردى اشىلۋ سالتاناتىندا تۇرەگەپ تۇرىپ قوشەمەتپەن قارسى الدى.
فرانتسيا پرەزيدەنتى ەممانۋەل ماكرون نوتر-دام شىركەۋىنىڭ اشىلۋ سالتاناتىندا ءسوز سويلەپ، فرانتسۋز حالقىنا العىسىن ءبىلدىردى.
«ەكى كۇن بۇرىن ۇكىمەت تاراتىلعاندىقتان نوتر-دامنىڭ اشىلۋىندا ءسوز سويلەۋ ماكرون ءۇشىن ماڭىزدى مۇمكىندىك بولدى. فرانتسيا پرەزيدەنتى بۇل كۇندى وسىلاي ەلەستەتپەگەن سياقتى. باستاپقىدا نوتر-دامدى وليمپيادا ويىندارى كەزىندە اشۋ جوسپارلانعان ەدى، بىراق بۇل ورىندالمادى. ال ۇكىمەت جوقتا ءورىنىس ءتىپتى كوڭىلسىز بولىپ تۇر»- دەپ جازدى RFI.
شىركەۋدىڭ اشىلۋىنان كەيىنگى العاشقى ءدىني ءراسىم 19:45 تە، ەممانۋەل ماكروننىڭ سوزىنەن كەيىن باستالىپ، 45 مينۋتقا سوزىلدى.
ريم پاپاسى فرانتسيسك شاراعا قاتىسقان جوق، بىراق شىركەۋدىڭ باسشىسى وليۆە ريبادو ديۋما بريفينگىندە حابارلاعانداي، ول پاريج ارحيەپيسكوپىنا "فرانتسۋز حالقىنا ارنالعان" حابارلاما جىبەرگەن.
"بۇل كەرەمەت شىركەۋدىڭ قايتا جاندانۋى فرانتسياداعى شىركەۋدىڭ قايتا ورلەۋىنىڭ بەلگىسى بولسىن", - دەپ جازىلعان بۇل حابارلامادا.
