ماڭعىستاۋ اكىمدىگىنىڭ الدىندا ءوز-ءوزىن ورتەپ جىبەرگەن ەر ادامنىڭ جاعدايى بەلگىلى بولدى. دارىگەرلەر ناۋقاستىڭ جاعدايى اۋىر ەكەنىن مالىمدەدى، دەپ حابارلايدى “ادىرنا” ۇلتتىق پورتالى.
اۋرۋحانانىڭ ءباسپاسوز قىزمەتى 6 جەلتوقسان كۇنى تاڭەرتەڭ ەر ادامنىڭ جاعدايى اۋىر ەكەنىن ايتتى.
Lada باسىلىمىنىڭ مالىمەتىنشە، ناۋقاس مەحانيكالىق جەلدەتۋ اپپاراتىنا قوسىلعان، ءدارى-دارمەكپەن سەداتسيالانعان جانە گەموديناميكا ءدارى-دارمەكتەرمەن قامتاماسىز ەتىلگەن.
دارىگەرلەر استاناداعى ۇلتتىق شۇعىل مەديتسينانى ۇيلەستىرۋ ورتالىعىنىڭ رەانيماتولوگىمەن جانە كومبۋستيولوگپەن كەڭەسۋدى جوسپارلاپ وتىر.
اقتاۋلىق بلوگەر ازامات سارسەنباەۆ جابىرلەنۋشى جايلى ەگجەي-تەگجەيلى ايتىپ بەردى. ونىڭ سوزىنشە، ەر ادام Samruk Business Academy كومپانياسىندا وكك كومپانياسىنىڭ "توكماك" تۇزسىزداندىرۋ زاۋىتىن سالۋ جوباسىندا جۇمىس ىستەگەن. جۇمىس مەرزىمى ۋاقىتشا بولعان. كەلىسىمشارت ءبىر جىلعا عانا جاسالعان. جوبا اياقتالعاننان كەيىن ەر ادام شتاتقا قابىلدانباعان، سوعان نارازىلىعىن بىلدىرگەن.
بۇرىنعى جۇمىسشى ءوزىنىڭ قيىن قارجىلىق جاعدايى مەن نەسيەلەرى بارىن ايتىپ، تۇراقتى جۇمىسقا ورنالاسۋدى تالاپ ەتكەن. وبلىس اكىمدىگى وعان "كاسپي" تۇششىلاندىرۋ زاۋىتىندا جانە باسقا دا ۇيىمداردا بوس جۇمىس ورىندارىن ۇسىنعان.
ەر ادام ۇسىنىلعان بوس ورىندارعا نارازى بولىپ، وكك-دا جۇمىسقا ورنالاسۋ ماسەلەسىن شەشۋ ءۇشىن وبلىس اكىمىمەن كەزدەسۋدى تالاپ ەتە باستاعان. ايتپەسە ول ءوزىن ورتەپ جىبەرەمىن دەپ قورقىتقان دەيدى سارسەنباەۆ.
ايتا كەتسەك، ەر ادام 5 جەلتوقساندا ماڭعىستاۋ وبلىستىق اكىمدىگىنە بارىپ، ءوڭىر باسشىسىنىڭ جەكە قابىلداۋىنا كىرگىزۋدى سۇراعان.
اكىمدىك قىزمەتكەرلەرى وعان تۇرعىنداردى جەكە سۇراقتارى بويىنشا قابىلداۋ جۇرگىزىلىپ جاتپاعانىن، بەكىتىلگەن گرافيككە سايكەس جازىلىپ كەلۋىن وتىنگەن. سودان سوڭ ونى قاراقيا اۋدانى اكىمىنىڭ ورىنباسارى قابىلداعان. الايدا وعان قاناعاتتانباعان ازامات ۇستىنە جانارماي قۇيىپ، ءوزىن ورتەپ جىبەرگەن ەدى.
پوليتسيا مەن اكىمدىك قىزمەتكەرلەرىنىڭ كومەگىمەن ءورت ءسوندىرىلىپ، زارداپ شەككەن ادام اۋرۋحاناعا جەتكىزىلدى.
