بۇگىن الماتى قالالىق ءماسليحاتىنىڭ كەزەكتەن تىس XXV سەسسياسى ءوتتى. ءماجىلىس بارىسىندا الەۋمەتتىك سالا، ينفراقۇرىلىم، كاسىپكەرلىكتى دامىتۋ جانە كوگالداندىرۋ ماسەلەلەرى جان-جاقتى قاراستىرىلدى.قالا اكىمدىگى مەن ءماسليحات دەپۋتاتتارى الداعى جىلدارعا ارنالعان ماقساتتار مەن مىندەتتەردى انىقتاپ، قارجىلىق رەسۋرستاردى ءتيىمدى پايدالانۋدىڭ جولدارىن تالقىلادى.
قالا اكىمنىڭ بايانداماسىنا سۇيەنسەك، الداعى ءۇش جىلدا الماتى بيۋدجەتى 2,1 ترلن تەڭگەگە جەتەدى. بۇل بۇرىن-سوڭدى بولماعان كورسەتكىش. بيۋدجەت كولەمىنىڭ ارتۋى ەكونوميكانىڭ تۇراقتى وسۋىمەن بايلانىستى. 2024 جىلى الماتى ەكونوميكاسى 5,5%-عا وسەدى دەپ كۇتىلسە، 2025 جىلى بۇل كورسەتكىش 6,4%-عا جەتپەك. مۇنداي ءوسىمنىڭ ارقاسىندا قالا تۇرعىندارىنىڭ ءومىر ساپاسى جاقسارىپ، الماتى زاماناۋي مەگاپوليسكە اينالادى.
بيۋدجەتتىڭ 40%-ى الەۋمەتتىك سالاعا باعىتتالادى. دەمەك، دەنساۋلىق ساقتاۋ، ءبىلىم بەرۋ جانە تۇرعىنداردىڭ ءال-اۋقاتىن جاقسارتۋعا ەرەكشە كوڭىل بولىنەدى. سونىمەن قاتار، 455,9 ملرد تەڭگە ينجەنەرلىك جانە كولىك ينفراقۇرىلىمىن دامىتۋعا بولىنسە، قالانى كوگالداندىرۋعا 170,5 ملرد تەڭگە قاراستىرىلعان. وسى قارجىنىڭ ارقاسىندا قالادا 1 ميلليون اعاش قامتىلىپ، جاڭا سۋارۋ جۇيەلەرى ورناتىلادى.
الماتىنىڭ باستى ماقساتى – زاماناۋي ءارى جايلى قالاعا اينالۋ. مۇنى جۇزەگە اسىرۋ ءۇشىن كولىك جۇيەسىن جاڭعىرتۋ، ەكولوگيالىق تازا قوعامدىق كولىكتەردى ەنگىزۋ جانە جاڭا جولدار سالۋ جوسپارلانىپ وتىر. 2025 جىلعا قاراي گازبەن جۇرەتىن 600 اۆتوبۋس پەن 100 ەلەكتر اۆتوبۋسى قالا كوشەلەرىنە شىعادى.
ءماسليحات وتىرىسىندا الماتىنىڭ زاماناۋي مەگاپوليسكە اينالۋى ءۇشىن ناقتى قادامدار جاسالدى. قالانىڭ ءاربىر تۇرعىنى بۇل وزگەرىستەردىڭ وڭ ناتيجەسىن سەزىنەدى دەپ كۇتىلۋدە. ءماسليحات دەپۋتاتتارى مەن قالا باسشىلىعى الداعى ءۇش جىلدا بارلىق جوسپارلانعان مىندەتتەردى ساپالى ورىنداۋعا دايىن ەكەندىكتەرىن ءبىلدىردى.
