وڭتۇستىك كورەيانىڭ قۇقىق قورعاۋ ورگاندارى پرەزيدەنت يۋن سوك يولگە قاتىستى مەملەكەتتىك ساتقىندىق ايىبىمەن تەرگەۋدى باستادى. بۇل ايىپتاۋلار 3 جەلتوقساندا ەلدە جاريالانعان اسكەري جاعدايمەن بايلانىستى، دەپ حابارلايدى "ادىرنا" ۇلتتىق پورتالى Yonhap اقپارات اگەنتتىگىنە سىلتەپ.
تەرگەۋدى باستاۋعا ەكى شاعىم سەبەپ بولعان. ءبىرىنشىسى وپپوزيتسيالىق «كورەيانىڭ قايتا ورلەۋى» پارتياسىنان ءتۇستى. ال ەكىنشىسى — 59 ازاماتتىق بەلسەندىدەن قۇرالعان توپتىڭ ارىزى.
شاعىم بەرۋشىلەر ەل پرەزيدەنتىنەن بولەك، بىرقاتار جوعارى لاۋازىمدى تۇلعالاردى دا مەملەكەتتىك ساتقىندىققا قاتىسى بار دەپ ايىپتادى. ولار - بۇرىنعى قورعانىس ءمينيسترى كيم يون حەن، ارميا شتابىنىڭ باسشىسى، گەنەرال پاك ان سۋ جانە ىشكى ىستەر ءمينيسترى لي سان مين بار.
بۇرىنعى قورعانىس ءمينيسترى كيم يون حەنگە تاعىلعان ايىپتارعا بايلانىستى ەلدەن شىعۋعا تىيىم سالىندى. پروكۋراتۋرا ونى مەملەكەتكە وپاسىزدىق جاساعانى جانە بۇلىك ۇيىمداستىرۋعا ارەكەتتەنگەنى ءۇشىن تەرگەۋ اياسىندا باقىلاۋعا الدى.
3 جەلتوقساندا پرەزيدەنت يۋن سوك يول ەلدەگى ساياسي شيەلەنىستى نەگىزگە الا وتىرىپ، اسكەري جاعداي جاريالادى. ول وپپوزيتسيالىق توپتاردى «مەملەكەتكە قارسى ارەكەتتەرگە» قاتىسقان دەپ ايىپتادى.
اسكەري جاعدايدىڭ جاريالانۋىمەن بىرگە قورعانىس مينيسترلىگى ەلدىڭ اسكەري باسشىلىعىنا ارنايى نۇسقاۋلىق بەرىپ، جوعارى دايىندىق رەجيمىندە بولۋعا شاقىردى. اسكەري بولىمشەلەردىڭ كەيبىرى ۇلتتىق اسسامبلەيا عيماراتىنا كىرگىزىلگەن.
اسكەري جاعدايدى جاريالاۋ پارلامەنتتە ۇلكەن قارسىلىق تۋدىردى. ۇلتتىق اسسامبلەيانىڭ كەزەكتەن تىس وتىرىسىندا دەپۋتاتتاردىڭ كوپشىلىگى اسكەري جاعدايدى توقتاتۋعا داۋىس بەردى. 190 دەپۋتات پرەزيدەنتتىڭ شەشىمىنە قارسى داۋىس بەرىپ، اسكەري جاعدايدى جارامسىز دەپ تانىدى.
پارلامەنت وكىلدەرى اسكەري جاعداي تۋرالى شەشىم قابىلدانعاننان كەيىن ونىڭ زاڭدى كۇشى جويىلعانىن مالىمدەدى.
پارلامەنتتەگى قارسىلىقتان كەيىن پرەزيدەنت يۋن سوك يول شەشىمىن قايتا قاراپ، شۇعىل ۇكىمەت وتىرىسىن شاقىردى. مينيسترلەر كابينەتىنىڭ ماقۇلداۋىمەن ول اسكەري جاعدايدى رەسمي تۇردە توقتاتقانىن جاريالادى.
اسكەري جاعداي جاريالانۋى ەل ىشىندە ۇلكەن تولقۋلار مەن نارازىلىقتارعا سەبەپ بولدى. وپپوزيتسيالىق پارتيالار مەن ازاماتتىق قوعام وكىلدەرى بۇل ارەكەتتى دەموكراتيالىق قاعيدالارعا قايشى دەپ سىنعا الدى.
وڭتۇستىك كورەيادا بولىپ جاتقان بۇل وقيعالار ەلدەگى دەموكراتيا مەن ساياسي تۇراقتىلىق ءۇشىن ۇلكەن سىناق بولماق. پرەزيدەنتكە قاتىستى تەرگەۋ جانە اسكەري جاعدايدىڭ ۋاقىتشا جاريالانۋى ەلدەگى ساياسي لاندشافتتىڭ وزگەرۋ مۇمكىندىگىن كورسەتەدى. قازىرگى جاعداي پرەزيدەنت يۋن سوك ءيولدىڭ ءارى قارايعى ساياسي مانسابى مەن ەلدەگى بيلىك قۇرىلىمىنا ەلەۋلى اسەر ەتۋى مۇمكىن.
ەسكە سالا كەتسەك، وڭتۇستىك كورەيا - پرەزيدەنتتەرى كوپ سوتتالعان ەلدىڭ ءبىرى. سوڭعى 60 جىلدا وڭتۇستىك كورەيادا سوتتالماعان، باسى ساياسي داۋعا ىلىكپەگەن پرەزيدەنت رەتىندە ەلدى 2017 -2022 جىلدارى باسقارعان مۋن چجە ءيننىڭ عانا اتى اتالادى.
