Ońtústik Koreıanyń quqyq qorǵaý organdary prezıdent Iýn Sok Iolge qatysty memlekettik satqyndyq aıybymen tergeýdi bastady. Bul aıyptaýlar 3 jeltoqsanda elde jarııalanǵan áskerı jaǵdaımen baılanysty, dep habarlaıdy "Adyrna" ulttyq portaly Yonhap aqparat agenttigine siltep.
Tergeýdi bastaýǵa eki shaǵym sebep bolǵan. Birinshisi oppozıııalyq «Koreıanyń qaıta órleýi» partııasynan tústi. Al ekinshisi — 59 azamattyq belsendiden quralǵan toptyń aryzy.
Shaǵym berýshiler el prezıdentinen bólek, birqatar joǵary laýazymdy tulǵalardy da memlekettik satqyndyqqa qatysy bar dep aıyptady. Olar - burynǵy qorǵanys mınıstri Kım Ion Hen, armııa shtabynyń basshysy, general Pak An Sý jáne ishki ister mınıstri Lı San Mın bar.
Burynǵy qorǵanys mınıstri Kım Ion Henge taǵylǵan aıyptarǵa baılanysty elden shyǵýǵa tyıym salyndy. Prokýratýra ony memleketke opasyzdyq jasaǵany jáne búlik uıymdastyrýǵa árekettengeni úshin tergeý aıasynda baqylaýǵa aldy.
3 jeltoqsanda prezıdent Iýn Sok Iol eldegi saıası shıelenisti negizge ala otyryp, áskerı jaǵdaı jarııalady. Ol oppozıııalyq toptardy «memleketke qarsy áreketterge» qatysqan dep aıyptady.
Áskerı jaǵdaıdyń jarııalanýymen birge Qorǵanys mınıstrligi eldiń áskerı basshylyǵyna arnaıy nusqaýlyq berip, joǵary daıyndyq rejıminde bolýǵa shaqyrdy. Áskerı bólimshelerdiń keıbiri Ulttyq assambleıa ǵımaratyna kirgizilgen.
Áskerı jaǵdaıdy jarııalaý parlamentte úlken qarsylyq týdyrdy. Ulttyq assambleıanyń kezekten tys otyrysynda depýtattardyń kópshiligi áskerı jaǵdaıdy toqtatýǵa daýys berdi. 190 depýtat prezıdenttiń sheshimine qarsy daýys berip, áskerı jaǵdaıdy jaramsyz dep tanydy.
Parlament ókilderi áskerı jaǵdaı týraly sheshim qabyldanǵannan keıin onyń zańdy kúshi joıylǵanyn málimdedi.
Parlamenttegi qarsylyqtan keıin prezıdent Iýn Sok Iol sheshimin qaıta qarap, shuǵyl úkimet otyrysyn shaqyrdy. Mınıstrler kabınetiniń maquldaýymen ol áskerı jaǵdaıdy resmı túrde toqtatqanyn jarııalady.
Áskerı jaǵdaı jarııalanýy el ishinde úlken tolqýlar men narazylyqtarǵa sebep boldy. Oppozıııalyq partııalar men azamattyq qoǵam ókilderi bul áreketti demokratııalyq qaǵıdalarǵa qaıshy dep synǵa aldy.
Ońtústik Koreıada bolyp jatqan bul oqıǵalar eldegi demokratııa men saıası turaqtylyq úshin úlken synaq bolmaq. Prezıdentke qatysty tergeý jáne áskerı jaǵdaıdyń ýaqytsha jarııalanýy eldegi saıası landshafttyń ózgerý múmkindigin kórsetedi. Qazirgi jaǵdaı prezıdent Iýn Sok Ioldiń ári qaraıǵy saıası mansaby men eldegi bılik qurylymyna eleýli áser etýi múmkin.
Eske sala ketsek, Ońtústik Koreıa - prezıdentteri kóp sottalǵan eldiń biri. Sońǵy 60 jylda Ońtústik Koreıada sottalmaǵan, basy saıası daýǵa ilikpegen prezıdent retinde eldi 2017 -2022 jyldary basqarǵan Mýn Chje Inniń ǵana aty atalady.
