قازاقستاننىڭ وڭتۇستىك كورەياداعى بۇرىنعى ەلشىسى، قازىر دە وسى ەلدە جۇرگەن دۋلات باقىشەۆ الەۋمەتتىك جەلىدەگى پاراقشاسىنا اسكەري جاعداي دوعارىلىپ، ەل ءىشى تىنىشتالعانى تۋرالى جازدى.
«كەشە تۇندە وڭتۇستىك كورەيا پرەزيدەنتى اسكەري جاعداي (توتەنشە) جاريالاعان ەدى. جاعداي 6 ساعاتقا عانا سوزىلدى. پارلامەنتتە 190 - داي دەپۋتات داۋىس بەرىپ، بۇل شەشىمگە قارسى شىققان بولاتىن. پرەزيدەنتكە جاقتاس، جەتەكشى پارتيادان دا 18 دەپۋتات وپپوزيتسيامەن بىرگە داۋىس بەردى»، - دەپ جازعان ديپلومات.
دۋلات باقىشەۆتىڭ جازعانىنا قاراعاندا، وسىدان كەيىن مينيسترلەر كابينەتى توتەنشە جاعدايدى توقتاتۋعا ۇيعارعان. «سونىمەن بۇل شارۋا ءبىتتى. ءبىر ماسەلە شەشىلدى. بۇگىن تاڭدا پرەزيدەنت اكىمشىلىگى باسشىسىنان باستاپ، ول جەردەگى كەڭەسشىلەر مەن ماڭىزدى لاۋازىمدى تۇلعالار جۇمىستان كەتۋ تۋرالى جاپپاي ارىز بەردى»،- دەيدى ول.
وڭتۇستىك كورەيادا 2012-2018 جىلدار ارالىعىندا قازاقستاننىڭ ەلشىسى بولعان دۋلات باقىشەۆ الدا داعدارىس جالعاسادى دەپ سانايدى. «سۋعا تاس تاستاساڭ تولقىندار پايدا بولىپ، تارايدى عوي. ساياساتتا دا ءدال سولاي... "ەڭ قىزىعى" ەندى باستالدى. ياعني، داعدارىس جالعاساتىن بولادى. نەمەن اياقتالارىن ۋاقىت قانا كورسەتەدى...» - دەيدى ديپلومات.
بۇدان الدىڭعى ءبىر جازباسىندا ول جەلىگە «سوڭعى كەزدەرى رف پەن كحدر اراسىنداعى ىنتىماقتاستىقتىڭ كۇشەيۋى وڭتۇستىك كورەياداعى ىشكى ساياسي جاعدايدى ۋشىقتىرىپ كەلدى. بۇل - كەسكىلەسكەن ىشكى ساياسي شايقاستىڭ بەلگىسى. قاتتى ۋشىققان ءتۇرى»، - دەپ جازعان ەدى. ايتۋىنشا، جەتەكشى پارتيا باسشىسى دا اسكەري جاعداي جاريالاۋعا قارسى بولعان.
«قازاقستانداعىلار وڭتۇستىك كورەيادا جۇرگەن تۋعان-تۋىسقان، دوس - جاراندارىڭىز تۋرالى ۋايىمداماڭىز. ەل تىنىش!» - دەيدى دۋلات باقىشەۆ بۇگىنگى جازباسىندا.
كەشە قازاقستاننىڭ كورەياداعى ەلشىلىگى قازاقستاندىقتارعا ۇندەۋ جاساعان. “كورەيا رەسپۋبليكاسى پرەزيدەنتى يۋن سوك ەلدىڭ اسكەري جاعداي ەنگىزۋىنە بايلانىستى كورەيا رەسپۋبليكاسىندا جۇرگەن قازاقستان ازاماتتارىن سابىر ساقتاپ، جەرگىلىكتى بيلىكتىڭ ۇسىنىستارىن ورىنداۋعا جانە كوپشىلىك ءىس-شارالاردان اۋلاق بولۋعا شاقىرامىز”، - دەلىنگەن ەدى ەلشىلىكتىڭ حابارلاماسىندا.
كەشە وڭتۇستىك كورەيا پرەزيدەنتى يۋن سوك ەل حالقىنا جولداۋ جاساپ، ەلدە اسكەري توتەنشە جاعداي جاريالانعانىن ايتقان. ول شۇعىل كەڭەس وتكىزىپ، وزىنە يمپيچمەنت جاريالاۋ ارەكەتى جاسالعانىن مالىمدەگەن. ول وپپوزيتسيانى ەلدىڭ نەگىزگى قىزمەتتەرىن ورىنداۋ ءۇشىن قاجەتتى بارلىق ماڭىزدى بيۋدجەت قاراجاتتارىن قىسقارتتى دەپ ايىپتاعان. اسكەري جاعداي جاريالانعان سوڭ التى ساعاتتان سوڭ قايتا توقتاتىلدى. اسكەري جاعدايدى دوعارۋ پارلامەنتتىڭ تالابىمەن جۇزەگە استى.
وڭتۇستىك كورەيانىڭ ساياسي قۇرىلىسى – كوپپارتيالى پرەزيدەنتتىك رەسپۋبليكا.
