2025 جىلى رەسەيدىڭ بيۋدجەت شىعىندارىنىڭ 41%-ى اسكەري ماقساتتارعا جۇمسالاتىن بولادى. پرەزيدەنت پۋتين ءۇش جىلدىق بيۋدجەت تۋرالى زاڭعا قول قويىپ، اسكەري شىعىنداردى 25%-عا ارتتىرماق، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
رەسەي پرەزيدەنتى ۆلاديمير پۋتين 2025-2027 جىلدار ارالىعىنداعى مەملەكەتتىك بيۋدجەت تۋرالى زاڭعا قول قويدى. 1 جەلتوقساندا قۇقىقتىق اقپارات پورتالىندا جاريالانعان قۇجات رەسەيدىڭ جاڭا تاريحىنداعى اسكەري شىعىنداردىڭ رەكوردتىق دەڭگەيگە جەتكەنىن كورسەتەدى.
2025 جىلى "ۇلتتىق قورعانىس" بابى بويىنشا شىعىندار 13,5 تريلليون ءرۋبلدى (رەسەي ءجىو-ءنىڭ 6,31%-ى جانە ەل شىعىندارىنىڭ 41%-ى) قۇرايدى. بۇل 2024 جىلمەن سالىستىرعاندا شامامەن 25%-عا كوپ. كەلەسى جىلدارى اسكەري شىعىندار ءسال تومەندەيدى. ياعني، 2026 جىلى 12,8 ترلن رۋبل، ال 2027 جىلى 13,1 ترلن رۋبل بولادى دەپ جوسپارلانعان.
بۇعان دەيىن رەسەيدىڭ قارجى ءمينيسترى انتون سيلۋانوۆ جاڭا بيۋدجەتتە كۇشتىك قۇرىلىمداردىڭ جابىق باپتار بويىنشا شىعىندارىنىڭ ارتقانىن ايتقان. Reuters اگەنتتىگى بارلىق شىعىنداردىڭ شامامەن ۇشتەن ءبىر بولىگى جاريالانبايتىنىن مالىمدەدى.
بارلىق ءۇش جىل بويى مەملەكەتتىك بيۋدجەت تاپشىلىقتى كورسەتەدى (2025 جىلى ءجىو-ءنىڭ 0,5%-ى، 2026 جىلى 0,9%، ال 2027 جىلى 1,1%).
21 قاراشادا مەملەكەتتىك دۋما 2025 جانە 2026-2027 جىلدارعا ارنالعان فەدەرالدىق بيۋدجەت تۋرالى زاڭدى قابىلدادى، ال 27 قاراشادا فەدەراتسيا كەڭەسى ونى ماقۇلدادى.
