اباي اتىنداعى قازۇپۋ-دا يۋنەسكو قورعاۋىنداعى قازاقستاننىڭ تاريحي جانە مادەني مۇراسىن قورعاۋ جونىندەگى جۇمىس توبىنىڭ ەكىنشى وتىرىسى ءوتتى.
جيىنعا قر مادەنيەت جانە اقپارات ءمينيسترى ايدا بالاەۆا توراعالىق ەتتى.
وتىرىسقا وبلىس اكىمدەرىنىڭ ورىنباسارلارى، ورتالىق مەملەكەتتىك ورگانداردىڭ وكىلدەرى، قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ مۇشەلەرى، سونداي-اق عالىمدار، ارحەولوگتار مەن قوعامدىق ۇيىم وكىلدەرى قاتىستى.
قاتىسۋشىلار ماتەريالدىق ەمەس مادەني جانە دۇنيەجۇزىلىك مۇرانى قورعاۋ شارالارىن جاقسارتۋعا باعىتتالعان ءىس-شارالار جوسپارىن، سونداي-اق يۋنەسكو-نىڭ «الەم جادى» حالىقارالىق باعدارلاماسىن جۇزەگە اسىرۋ ماسەلەلەرىن تالقىلادى.
ايدا بالاەۆا يۋنەسكو كونۆەنتسيالارىمەن بەكىتىلگەن مىندەتتەمەلەردى ورىنداۋدىڭ ماڭىزدىلىعىن اتاپ ءوتتى. مينيستر بارلىق دەڭگەيلەردە ۇيلەسىمدى جۇمىس قاجەتتىگىن جانە ماتەريالدىق ەمەس مادەني مۇرانى انىقتاۋ مەن دامىتۋ داعدىلارى بويىنشا كادرلاردى دايارلاۋ ءۇشىن بىلىكتى ساراپشىلاردى تارتۋدىڭ ماڭىزدىلىعىن ايتتى.
«ەڭ الدىمەن، مامانداردىڭ بىلىكتىلىگىن ارتتىرۋ بويىنشا جۇمىستى كۇشەيتۋىمىز قاجەت. وقىتۋ مازمۇندى جانە پايدالى بولۋى ءتيىس. جەدەل تۇردە وقۋ مودۋلدەرىن دايىنداپ، وڭىرلىك جانە ورتالىق دەڭگەيدە كۋرستار وتكىزۋگە كىرىسۋىمىز كەرەك»، – دەدى مينيستر.
قازاقستاننىڭ ماتەريالدىق ەمەس مادەني مۇرانى قورعاۋ جونىندەگى ۇلتتىق كوميتەتى توراعاسىنىڭ ورىنباسارى رۇستەم مۇزافاروۆ، قازاقستاننىڭ دۇنيەجۇزىلىك مۇراسى جونىندەگى كوميتەتتىڭ توراعاسى گۇلميرا مۇحتاروۆا جانە يۋنەسكو-نىڭ «الەم جادى» باعدارلاماسى بويىنشا ۇلتتىق كوميتەتىنىڭ توراعاسى عازيزا نۇرعاليەۆا قاتىسۋشىلارعا ءوز جۇمىس جوسپارلارىن ۇسىندى.
جوسپار اياسىندا جەرگىلىكتى اتقارۋشى ورگانداردىڭ ماماندارى مەن ەتنومادەني بىرلەستىك وكىلدەرىنىڭ بىلىكتىلىگىن ارتتىرۋ، سونداي-اق ماتەريالدىق ەمەس مادەني مۇرانى زەرتتەۋ جانە ناسيحاتتاۋ قاراستىرىلعان.
قاتىسۋشىلار پىكىر الماسىپ، الداعى جۇمىستىڭ باسىم باعىتتارىن ايقىندادى.
جيىن سوڭىندا ۇسىنىلعان شارالاردى ەنگىزۋ، بارلىق مۇددەلى تاراپتاردىڭ كۇش-جىگەرىن ۇيلەستىرۋ جانە قازاقستاننىڭ مادەني مۇراسىن قورعاۋ بويىنشا ءىس-شارالار كەشەنىن ءتيىمدى جۇزەگە اسىرۋ ءۇشىن ناقتى ۇسىنىستار ازىرلەۋ ماسەلەلەرى تالقىلاندى.
