قازاقستان ۇلتتىق بانكىنىڭ توراعا ورىنباسارى ۆيتالي تۋتۋشكين دوللار باعامىنىڭ كوتەرىلۋىنە پىكىر ءبىلدىردى، دەپ حابارلايدى “ادىرنا” ۇلتتىق پورتالى.
تۋتۋشكيننىڭ ايتۋىنشا، قازىرگى باعامنىڭ ءوسۋى نارىقتىق ۇدەرىستەردىڭ تابيعي كورىنىسى.
«جالپى، 500 — بۇل جاي عانا سان، وعان بايلانىپ قالۋدىڭ قاجەتى جوق. بۇگىن 500, ەرتەڭ 600 بولۋى مۇمكىن. باعام سۇرانىس پەن ۇسىنىستىڭ اراقاتىناسىنا بايلانىستى قالىپتاسادى. ءبىز ساننىڭ وزىنە تىم كوپ نازار اۋدارامىز دەپ ويلايمىن، ماڭىزدىسى — ونىڭ ديناميكاسى»، — دەپ ءتۇسىندىردى ۇلتتىق بانك توراعاسىنىڭ ورىنباسارى سەنات كۋلۋارىندا.
18 قاراشادا استاناداعى ايىرباستاۋ پۋنكتتەرىندە دوللار 500 تەڭگەدەن استى.
ۇلتتىق بانك توراعاسىنىڭ ورىنباسارى ءاليا مولدابەكوۆانىڭ ايتۋىنشا، سوڭعى ۋاقىتتا سىرتقى جانە ىشكى فاكتورلاردىڭ جيىنتىعى تەڭگەنىڭ السىرەۋىنە اكەلدى. سىرتقى سەكتورداعى جاعداي جاھاندىق ەكونوميكالىق قاۋىپتەر مەن جوعارى قۇبىلمالىلىق ساقتالعاندىقتان قولايسىز بولىپ تۇر. دوللار دامىعان جانە دامۋشى نارىقتاردىڭ ۆاليۋتالارىنا قاتىستى نىعايۋىن جالعاستىردى. الەمدىك سۇرانىستىڭ ءالسىز قالپىنا كەلۋى جانە وپەك+ تاراپىنان ۇسىنىستىڭ ارتۋى كۇتىلۋىنە بايلانىستى مۇناي باعاسى باررەلىنە 71-72 اقش دوللارىنا دەيىن تومەندەدى.
ىشكى ۆاليۋتا نارىعىندا ەكونوميكالىق اگەنتتەردىڭ شەتەل ۆاليۋتاسىنا سۇرانىسى ءوسىپ، ۆاليۋتا ۇسىنىسى شەكتەلىپ وتىر. شەتەل ۆاليۋتاسىنا سۇرانىستىڭ ارتۋى ەكونوميكالىق، ونىڭ ىشىندە سىرتقى ەكونوميكالىق بەلسەندىلىكتىڭ ۇلعايۋىمەن بايلانىستى. سونداي-اق بيۋدجەت شىعىندارى مەن كۆازيمەملەكەتتىك كومپانيالاردىڭ ينفراقۇرىلىمدىق جانە ينۆەستيتسيالىق جوبالارعا جۇمساعان شىعىستارىنىڭ ءوسۋى دە اسەر ەتۋدە. وسى فاكتورلاردىڭ بارلىعى يمپورتتىڭ ارتۋىن جانە سايكەسىنشە شەتەل ۆاليۋتاسىنا سۇرانىستىڭ ءوسۋىن ىنتالاندىرادى.
كۆازيمەملەكەتتىك سەكتوردى ۆاليۋتالىق تۇسىمدەرىنىڭ جارتىسىن ساتۋعا قايتا مىندەتتەيدى.
