Qazaqstan Ulttyq bankiniń tóraǵa orynbasary Vıtalıı Týtýshkın dollar baǵamynyń kóterilýine pikir bildirdi, dep habarlaıdy “Adyrna” ulttyq portaly.
Týtýshkınniń aıtýynsha, qazirgi baǵamnyń ósýi naryqtyq úderisterdiń tabıǵı kórinisi.
«Jalpy, 500 — bul jaı ǵana san, oǵan baılanyp qalýdyń qajeti joq. Búgin 500, erteń 600 bolýy múmkin. Baǵam suranys pen usynystyń araqatynasyna baılanysty qalyptasady. Biz sannyń ózine tym kóp nazar aýdaramyz dep oılaımyn, mańyzdysy — onyń dınamıkasy», — dep túsindirdi Ulttyq bank tóraǵasynyń orynbasary Senat kýlýarynda.
18 qarashada Astanadaǵy aıyrbastaý pýnktterinde dollar 500 teńgeden asty.
Ulttyq bank tóraǵasynyń orynbasary Álııa Moldabekovanyń aıtýynsha, sońǵy ýaqytta syrtqy jáne ishki faktorlardyń jıyntyǵy teńgeniń álsireýine ákeldi. Syrtqy sektordaǵy jaǵdaı jahandyq ekonomıkalyq qaýipter men joǵary qubylmalylyq saqtalǵandyqtan qolaısyz bolyp tur. Dollar damyǵan jáne damýshy naryqtardyń valıýtalaryna qatysty nyǵaıýyn jalǵastyrdy. Álemdik suranystyń álsiz qalpyna kelýi jáne OPEK+ tarapynan usynystyń artýy kútilýine baılanysty munaı baǵasy barreline 71-72 AQSh dollaryna deıin tómendedi.
Ishki valıýta naryǵynda ekonomıkalyq agentterdiń shetel valıýtasyna suranysy ósip, valıýta usynysy shektelip otyr. Shetel valıýtasyna suranystyń artýy ekonomıkalyq, onyń ishinde syrtqy ekonomıkalyq belsendiliktiń ulǵaıýymen baılanysty. Sondaı-aq bıýdjet shyǵyndary men kvazımemlekettik kompanııalardyń ınfraqurylymdyq jáne ınvestıııalyq jobalarǵa jumsaǵan shyǵystarynyń ósýi de áser etýde. Osy faktorlardyń barlyǵy ımporttyń artýyn jáne sáıkesinshe shetel valıýtasyna suranystyń ósýin yntalandyrady.
Kvazımemlekettik sektordy valıýtalyq túsimderiniń jartysyn satýǵa qaıta mindetteıdi.
