مەملەكەت باسشىسى قاسىم-جومارت توقاەۆ فرانتس كافكا اتىنداعى حالىقارالىق التىن مەدال سىيلىعىنىڭ لاۋرەاتى، قازاق رۋحانياتىنىڭ اسا كورنەكتى وكىلى، بەلگىلى اقىن ءشومىشباي ساريەۆتىڭ شىعارماشىلىعىنا ارنالعان كەشكە باردى، دەپ حابارلايدى “ادىرنا” ۇلتتىق پورتالى.
كونتسەرتتە قازاقستاندىق ەسترادا جۇلدىزدارى ونەر كورسەتىپ، ەسترادالىق-سيمفونيالىق وركەستردىڭ سۇيەمەلدەۋىمەن اقىن ءشومىشباي ساريەۆتىڭ (1946-2021) «اينالدىم سەنەن، اتامەكەن-اي»، «سالەم ساعان، تۋعان ەل»، «اياۋلىم»، «دومبىرا تۋرالى باللادا»، «وكىنبە سەن»، «ءومىر-وزەن»، «ساعىندىم ساعىم جىلدار»، «دوس كەرەك»، «سارىارقا» جانە تاعى باسقا ولەڭدەرىنە جازىلعان، حالىق سۇيىسپەنشىلىگىنە بولەنگەن اندەر ورىندالدى.
پرەزيدەنتپەن بىرگە كونتسەرتكە بارعان بيلىك وكىلدەرى اراسىنان ءماجىلىس توراعاسى ەرلان قوشانوۆ، پرەزيدەنت اكىمشىلىگىنىڭ قىزمەتكەرلەرى، پرەزيدەنت كەڭەسشىسى - پرەزيدەنتتىڭ ءباسپاسوز حاتشىسى بەرىك ءۋالي، مادەنيەت جانە اقپارات ءمينيسترى ايدا بالاەۆا جانە باسقا دا شەنەۋنىكتەر بايقالعان. بۇعان قوسا بالالار ومبۋدسمەنى دينارا زاكيەۆا،«ارداگەرلەر ۇيىمى» قوعامدىق بىرلەستىگى ورتالىق كەڭەسى توراعاسىنىڭ ورىنباسارى ومىرزاق وزعانباەۆ، جازۋشىلار وداعىنىڭ توراعاسى مەرەكە قۇلكەنوۆ جانە باسقا دا مادەنيەت جانە ادەبيەت سالاسىنىڭ وكىلدەرى بار.
