باتىس قازاقستان وبلىسىندا ءورت كەزىندە كوپقاباتتى ءۇيدىڭ تەرەزەسىنەن سەكىرگەن بالالار اۋرۋحاناعا جەتكىزىلدى، دەپ حابارلايدى «ادىرنا» ۇلتتىق پورتالى «موي گورود» باسىلىمىنا سىلتەپ.
«الەۋمەتتىك جەلىلەردە وقيعا ورنىنان تۇسىرىلگەن قورقىنىشتى بەينەلەر تاراۋدا. ۆيدەودا ءتورتىنشى قاباتتىڭ تەرەزەسىنەن ەكى كىشكەنتاي بالانىڭ سەكىرىپ جاتقانىن كورۋگە بولادى، ال تومەندە ولاردى ەر ادامدار ارنايى سوزىلعان جابىنمەن ۇستاپ الماق بولعان. وكىنىشكە قاراي، ەكىنشى بالا قۇلاعان كەزدە جابىننىڭ شەتى ءۇزىلىپ كەتكەن. ەكى بالا دا اۋرۋحاناعا جەتكىزىلدى. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى كەيىنىرەك ولاردىڭ جاعدايىنا قاتىستى تۇسىنىكتەمە بەرۋگە ۋادە بەردى»، – دەلىنگەن حابارلامادا.
مالىمەتتەرگە سايكەس، ءورت 22 قاراشا كۇنى تاڭەرتەڭ اقساي قالاسىنداعى 10-ىقشام اۋدانداعى №19 ۇيدە بولعان. بقو تجد مالىمەتىنشە، ءتورتىنشى قاباتتاعى پاتەردە جيھاز بەن جەكە زاتتار جانعان. ءورتتىڭ اۋدانى 60 شارشى مەتردى قۇرادى. قۇتقارۋشىلار 12 ادامدى، ونىڭ ىشىندە 7 بالانى ەۆاكۋاتسيالاعان.
ءورتتىڭ سەبەپتەرىن ماماندار انىقتاپ جاتىر. اقساي قالاسىنىڭ اكىمدىگى بۇل جاعدايدىڭ باقىلاۋدا ەكەنىن جانە وتباسىعا كومەك كورسەتىلەتىنىن مالىمدەدى.
