ءبىزدىڭ ەلدە ءوز ىسىنە بەرىلگەن، ادال ادامدار “اق قارعا” سياقتى، جىلدار بويى قالىپتاسقان داعدىعا ساي كەلمەي، جەپ ۇيرەنگەندەرگە كەدەرگى كەلتىرىپ، “دۇرىس جۇمىس ىستەتپەي” قوياتىن سياقتى. سولاي ەكەنىنە كۇن سايىن كوزىمىز جەتىپ كەلەدى. وسىنىڭ سالدارىنان جاڭا قازاقستاندا جاقسى جاعىنا وزگەرەمىز بە دەگەن ءۇمىت تە بىرتە-بىرتە ءسونىپ بارا جاتقانداي. سونىڭ ءبىر ايعاعى ۇستاز دەگەن اتتىڭ ءسينونيمى ىسپەتتەس، مىقتى، كرەاتيۆتى مەنەدجەر، ءوز سالاسىنا جان-تانىمەن بەرىلگەن سافۋرا سەيدۋاليقىزى تولەكتەگىنىڭ باسىنا تۇسكەن جاعداي.
ۇزىن ءسوزدىڭ قىسقاسى، سافۋرا حانىم باسقاراتىن ۇجىمعا قاتىستى انتيكور “مەملەكەت قاراجاتىن جىمقىرىپتى-مىس” دەگەن جەلەۋمەن ءىس قوزعاپ جاتىر ەكەن دەگەندى ەستىگەندە، بۇكىل ەل سەنەر-سەنبەسىمىزدى بىلمەي، مۇمكىن ەمەس دەپ ەدىك. ول ءىس بويىنشا كوكتەمدە سافۋرا سەيدۋاليقىزى ءوزى حابارلاسىپ، قۇقىقتىق كەڭەس سۇراعان بولاتىن. ء“سىزدىڭ تاراپىڭىزدان زاڭسىزدىق جوق قوي، سىياقىلار ۇنەمدەلگەن قارجىدان بەرىلسە” دەگەن ەدىم. ادالدىعىنا ءشۇبام بولماعاندىقتان، تەكسەرۋ بىتكەسىن، ءىستىڭ توقتاتىلاتىنىنا كۇمانىم بولماپ ەدى. ءبىزدىڭ اتىشۋلى انتيكورعا اق ادامدى قارا ەتۋ تۇك ەمەسىن قانشا كورسەم دە، ءدال وسى كىسىگە قيانات جاسالادى دەپ ويلاماعان ەكەنمىن.
ال ەندى بۇل ءىس نە ءىس؟ نەدەن باستالدى؟ سافۋرا سەيدۋاليقىزىنا نە ايىپ تاعىلىپ وتىر؟ ءبىر سەبەپ — باسقارمانىڭ ۇنەمدەلگەن قاراجاتىنان باسقارمادا ىستەگەن ازداعان مامانعا سىياقى بەرىلگەن ەكەن. سول زاڭسىز ارەكەت رەتىندە تانىلىپتى. شىن مانىندە بۇل مەكتەپتىڭ، بالاباقشانىڭ، كوللەدجدىڭ نەمەسە اۋداندىق، قالالىق ءبىلىم بولىمدەرىنىڭ قاراجاتى ەمەس، باسقارمانىڭ قىزمەتىنە، باسقارماداعى قىزمەتكەرلەردىڭ ەڭبەكاقىسىنا بەرىلگەن قاراجاتتىڭ ۇنەمدەلگەن بولىگى. باسقارما اشىلعان بەتتە ول جاقتا كادر تولىق جينالماعان، العاشقى ايلاردا ەكى ادام، التى ادام جۇمىس ىستەسە، سەگىز-توعىز ايعا دەيىن مامانداردىڭ تەك ەلۋ پايىزى قابىلدانعان. بۇل جاڭا وبلىستاردىڭ بارلىق باسقارمالارىندا بولعان جاعداي ەكەن. ولاي بولسا، انتيكوردان باستاپ جاڭادان قۇرىلعان بارلىق دەپارتامەنت، باسقارمالاردىڭ سىياقىلارىن دا زاڭسىز دەپ باعالاۋ كەرەك ەدى عوي.
جاقىندا سافۋرا حانىمنىڭ قوعامدىق قورعاۋشىسى بولىپ جۇرگەن اپكەسى دە ماعان قۇقىقتىق كەڭەس الۋ ءۇشىن حابارلاستى. بيۋدجەت سالاسىندا تاجىريبەسى مول بولعاندىقتان، ول كىسى كوپ قۇجاتتاردى ءوزى دە تالداعان. سول اپكەسىنەن ىسكە قاتىستى جالپىلاما اقپاراتتى ەستىپ، تاڭدانباسقا شارا قالمادى. تۇسىنگەنىم، سافۋرا حانىمنىڭ تۋراشىلدىعى، تالاپشىلدىعى، ادالدىعى بىرەۋلەرگە جاقپاي قالعان سياقتى. ولاي دەۋىمە نەگىز دە جوق ەمەس. ول باسقارما باسشىلىعىنا بارا سالا جۇمىسىن الدىمەن جالعان ديپلومدارمەن جۇمىس ىستەپ جاتقان “مۇعالىمدەردى” انىقتاپ، تازالاۋدان باستايدى. وننان استام ادامنىڭ ۇستىنەن جالعان قۇجات ءۇشىن ءتيىستى ورگاندا ءىس قوزعالىپ،ولار جۇمىستان شىعارىلادى.
ودان ءارى ۇلىتاۋ وبلىسى ءبىلىم باسقارماسىنىڭ باسشىسى سافۋرا تولەكتەگى سىبايلاس جەمقورلىققا قارسى كۇرەس دەپارتامەنتىنە، (قىسقاشا انتيكورعا) ءوزى حات جازىپ، ءبىلىم باسقارماسىنا قاراستى بارلىق مەكەمەلەرگە تەكسەرۋ جۇرگىزۋگە باستاما كوتەرەدى.ادال باسشى وسىلاي جۇمىس ىستەۋگە ءتيىس ەدى. الايدا سىبايلاس جەمقورلىققا قارسى ۇيىمداعىدار بۇلاي ويلامايدى ەكەن. وسىنىڭ سالدارىنان سافۋرانىڭ وسى قادامى اقىرىندا وزىنە تاياق بوپ تيگەن سياقتى.
سافۋرا سەيدۋاليقىزى تولەكتەگىنە قاتىستى ءىس تۋرالى تاعى بىرەر ءسوز. 2022 جىلدىڭ كۇزىندە وبلىستىق انتيكوردىڭ جاۋاپتى قىزمەتكەرى سافۋرا سەيدۋاليقىزىنا ءبىر ۇسىنىس ايتادى. جاڭا وبلىستىڭ قۇرىلۋىنا بايلانىستى انتيكوردىڭ ورتالىق اپپاراتىنان وبلىستىق دەپارتامەنتكە بۇرىن قولدانىلعان اۆتوكولىكتەر بەرىلەدى. وبلىستىق انتيكوردىڭ جاۋاپتى قىزمەتكەرى سافۋرا حانىمعا سول اۆتوكولىكتەردى كوللەدجدەردىڭ بالانسىنا الۋ تۋرالى ءوتىنىش ايتادى. سونداعى ونىڭ ءۋاجى قولدانىلعان كولىكتەردى وبلىستىق انتيكور ءوز بالانسىنا السا، كەيىننەن ورتالىق اپپارات كولىك سانى جەتكىلىكتى دەپ جاڭا كولىك ساتىپ الۋعا اقشا بولمەيتىندىگى. ارينە، سافۋرا حانىم «كولىكتەر ءبىلىم ۇيىمىنىڭ بالانسىنا بەرىلسە، سايكەسىنشە ول كوللەدجگە جۇرگىزۋشى شتاتى قوسىلادى، جانار-جاعار مايعا، سايمانىنا، اۆتومويكاعا قارجى بولىنەدى. سوندىقتان، قاي كوللەدج بالانسقا السا، سول كوللەدج قولدانادى» دەگەن. بىراق، انتيكور كولىكتەردى كوللەدج بالانسىنا قاعاز جۇزىندە قويىپ، ءىس جۇزىندە وزدەرى قولدانعىسى كەلىپتى. وسى اڭگىمە ەكى رەت قوزعالسا دا، سافۋرا حانىم كەلىسپەيدى. بىراق بۇل باسقا باسشى تاراپىنان قولداۋ تاپقان سياقتى. وزدەرىنە جايلى جاعداي جاساۋ ءۇشىن، بەكىتىلگەن ليميتتەن ارتىق كولىك الۋ ءۇشىن وبلىستىق انتيكوردىڭ ءوزى بار كولىكتى «جوق» دەپ كورسەتكىسى كەلەدى. بۇل جەمقورلىق ەمەس پە؟ زاڭسىز ارەكەت جاساۋ تۋرالى ۇسىنىستى باتىل تۇردە ايتا الاتىن انتيكوردان بۇدان سوڭ قانداي ادىلدىك كۇتەمىز؟
سىبايلاس جەمقورلىقپەن كۇرەس اگەنتتىگى ليميتكە ساي ۇلىتاۋ وبلىسىنىڭ انتيكورىنداعى كولىكتەردى تەكسەرىپ، ورتالىقتان بەرىلگەن كولىك پەن جاڭادان ساتىپ الىنڭان كولىكتەرىنە ءبىر رەۆيزيا جاساپ شىقسا دۇرىس بولار ەدى. قاي ۋاقىتتا قاي مەكەمەنىڭ بالانسىندا بولعانىنا دەيىن نازار اۋدارۋ كەرەك.
وكىنىشكە وراي، جوعارىدا ايتىلعان پروبلەمالار تەكسەرۋشىلەردىڭ نازارىنان مۇلدەم تىس قالعان. ءوزىنىڭ وسكەن جەرىنە ادال نيەتپەن بارعان ادام قازىر بىرنەشە ايدان بەرى ۇيقاماقتا وتىر. ءىستى تەرگەۋ بارىسىندا سافۋرا حانىمنىڭ بۇرىنعى ورىنباسارى (ول دا كۇدىكتى دەپ تانىلعان) ءوز-وزىنە قول جۇمساپ قايتىس بولىپتى.
سافۋرا حانىممەن ارىپتەس بولعان، ول كىسىنى تانيتىن ادامدار، حالىق ونىڭ ادالدىعىنا شەك كەلتىرمەيدى. سافۋرا سەيدۋاليقىزىنىڭ الەۋمەتتىك جەلىدەگى پاراقشاسىن ءبىر شولىپ شىعۋدىڭ ءوزى ول كىسىنىڭ ومىرلىك ۇستانىمىن ايقىن كورسەتەدى.بىراق سافۋرا سەيدۋاليقىزىنىڭ اپكەسىنىڭ ايتۋىنا قاراعاندا، انتيكور قىزمەتكەرلەرىنىڭ تاراپىنان بولىپ جاتقان ءتۇرلى پروتسەستىك بۇزۋشىلىقتاردىڭ كەسىرىنەن سوتقا دەيىنگى تەرگەۋ سوزىلىپ، سافۋرا حانىمنىڭ التى ايعا جۋىق زاڭسىز قاماۋدا وتىر. ساۋاتتى، ادال، باتىل بولعاندىقتان، ۇيقاماقتا وتىرسا دا، قورعاۋشىلارىمەن بىرگە انتيكوردىڭ نەگىزسىز شەشىمدەرىمەن تاباندى تۇردە كۇرەسۋدە. ادىلدىك سالتانات قۇرىپ، ءوز ءىسىنىڭ شىنايى جاناشىرى، ادال جان اقتالۋى كەرەك. بۇل تەك سافۋرانىڭ عانا ەمەس، ەلدەگى زاڭدىلىقتىڭ جەڭىسى بولادى.
لاززات احاتوۆا،
قوعام بەلسەندىسى، ادۆوكات
