اقتوبە وبلىسىندا قورعانىس مينيسترلىگىنە تيەسىلى تىكۇشاق قۇلاپ، ءبىر ادام قازا تاپتى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەپ.
ودان بولەك، ەكى ادام زارداپ شەكتى.
«مارتوك اۋدانىنىڭ حلەبوداروۆكا اۋىلى ماڭىندا تىكۇشاق قۇلادى»، – دەلىنگەن اگەنتتىك اقپاراتىندا.
اقتوبە وبلىسىنىڭ دەنساۋلىق ساقتاۋ باسقارماسىندا قالاعا ەكى ناۋقاس جەتكىزىلەتىنى دە ايتىلعان.
«اەرودرومدا ەكى جەدەل جاردەم بريگاداسى كۇتىپ تۇر. رەانيماتولوگتار، تراۆماتولوگتار جانە كومبۋستيولوگتاردان قۇرالعان شۇعىل بريگادا موب قابىلداۋ بولمەسىندە كۇتىپ وتىر»، – دەپ قوستى وبلىستىق دەنساۋلىق ساقتاۋ باسقارماسى.
اپاتقا قاتىستى توتەنشە جاعدايلار مينيسترلىگى دە اقپارات بەردى. دەرەكتە اۋە كەمەسىنىڭ «قاتتى قونۋى» تۋرالى حابارلاعان.
«بۇگىن، 9 قاراشا كۇنى 11:40-تا «112» قىزمەتىنە مارتوك اۋدانىنىڭ سارىجار اۋىلى ماڭىندا تىكۇشاقتىڭ «قاتتى قونۋى» تۋرالى حابار ءتۇستى. اۋە كەمەسى، الدىن الا مالىمەت بويىنشا، قر قورعانىس مينيسترلىگىنە تيەسىلى. وقيعا ورنىنا تجد كۇشتەرى مەن قۇرالدارى: بەس تەحنيكا جانە 23 ادام جىبەرىلدى. وقيعا ورنىنا جەتكەن تجم قۇتقارۋشىلارى ءورتتى ءسوندىردى. مي-8 ۇلگىسىندەگى تىكۇشاق بورتىندا ءۇش ادام بولعان. سونىڭ ءبىرى قازا تاپتى. ەكى زارداپ شەككەن ازامات اقتوبە قالاسىنا قر قم ۆيسۆو ياك-40 ۇشاعىمەن جەتكىزىلدى. وقيعا تۋرالى اقپارات ناقتىلانۋدا»، – دەپ حابارلادى تجم.
وتكەن جىلى تالدىقورعانداعى اسكەري اەروبازادا جاۋىنگەرلىك ۇشاقتى دايىنداۋ كەزىندە اسكەري قىزمەتشى قازا تاپقان بولاتىن.
