رەسەي قازاقستانمەن بىرگە بىرلەسكەن تاريحشىلار توبىن قۇرۋدى كوزدەپ وتىر، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
- رەسەي مەن قازاقستاندا ءبىزدىڭ ورتاق تاريحي جولمەن وتكەنىمىزبەن جانە قازىرگى تاريحىمەن بايلانىستى تاقىرىپتار ارا-تۇرا تۋىنداپ وتىرادى. وسى رەتتە، بىرلەسكەن تاريحشىلار توبىن قۇرۋ تۋرالى وڭ كەلىسىمگە قول جەتكىزىلگەنىن اتاپ وتكىم كەلەدى، - دەدى رەسەيدىڭ سىرتقى ىستەر ءمينيسترى سەرگەي لاۆروۆ استاناداعى مەملەكەتتىك باسقارۋ اكادەمياسىنىڭ ديپلوماتيا ينستيتۋتىندا.
مينيستر مۇنداي قادامنىڭ ەكى ەلگە دە پايدالى ەكەنىن جانە قوعامنىڭ كەي بولىگىندە پايدا بولاتىن پىكىرتالاستاردى باسەڭدەتۋگە كومەكتەسەتىنىن اتاپ ءوتتى. ونىڭ سوزىنشە، بۇل باستاما ءوزارا كەلىسىم نەگىزىندە جۇزەگە اسىرىلىپ جاتىر.
سونىمەن قاتار، مينيستر لاۆروۆ قازاقستان مەن رەسەي اراسىندا شەشۋدى تالاپ ەتەتىن بىرقاتار ماسەلەلەر بار ەكەنىن اتاپ ءوتتى.
- ەكى مەملەكەت اراسىنداعى قارىم-قاتىناستا ماسەلەلەر بولماسا، وندا قارىم-قاتىناستىڭ ءوزى دە جوق دەگەن ءسوز. كەز كەلگەن ەكىجاقتى قارىم-قاتىناستا كۇن ءتارتىبى قانشالىقتى باي بولسا، سونشالىقتى كوپ ناقتى شەشىمدەردى قاجەت ەتەتىن ماسەلەلەر تۋىندايدى. بىزدە قازاقستانمەن، بىزگە دوس ءارى وداقتاس مەملەكەتپەن قارىم-قاتىناستار ءدال وسىلاي دامىپ كەلەدى، - دەدى لاۆروۆ.
