Resei Qazaqstanmen bırge bırlesken tarihşylar tobyn qūrudy közdep otyr, dep habarlaidy “Adyrna” ūlttyq portaly QazTAG agenttıgıne sıltep.
- Resei men Qazaqstanda bızdıŋ ortaq tarihi jolmen ötkenımızben jäne qazırgı tarihymen bailanysty taqyryptar ara-tūra tuyndap otyrady. Osy rette, bırlesken tarihşylar tobyn qūru turaly oŋ kelısımge qol jetkızılgenın atap ötkım keledı, - dedı Reseidıŋ syrtqy ıster ministrı Sergei Lavrov Astanadaǧy Memlekettık basqaru akademiiasynyŋ Diplomatiia institutynda.
Ministr mūndai qadamnyŋ ekı elge de paidaly ekenın jäne qoǧamnyŋ kei bölıgınde paida bolatyn pıkırtalastardy bäseŋdetuge kömektesetının atap öttı. Onyŋ sözınşe, būl bastama özara kelısım negızınde jüzege asyrylyp jatyr.
Sonymen qatar, ministr Lavrov Qazaqstan men Resei arasynda şeşudı talap etetın bırqatar mäseleler bar ekenın atap öttı.
- Ekı memleket arasyndaǧy qarym-qatynasta mäseleler bolmasa, onda qarym-qatynastyŋ özı de joq degen söz. Kez kelgen ekıjaqty qarym-qatynasta kün tärtıbı qanşalyqty bai bolsa, sonşalyqty köp naqty şeşımderdı qajet etetın mäseleler tuyndaidy. Bızde Qazaqstanmen, bızge dos ärı odaqtas memleketpen qarym-qatynastar däl osylai damyp keledı, - dedı Lavrov.
Ūqsas jaŋalyqtar
