ليۆاندا سوققى سالدارىنان قازا تاپقاندار سانى ارتىپ جاتىر، دەپ حابارلايدى "ادىرنا" ۇلتتىق پورتالى.
شەتەلدىك باق-تا يزرايل سوققىسىنان كەمىندە 20 ادام قازا تاپقانى حابارلاندى.
2024 جىلدىڭ 6 قاراشاسىندا ءيزرايلدىڭ اسكەري-اۋە كۇشتەرى ليۆاننىڭ وڭتۇستىگىندە ورنالاسقان باردجا قالاسىنا اۋە سوققىسىن جاسادى، ناتيجەسىندە 20 ادام قازا تاۋىپ، 14 ادام جاراقات الدى.
ليۆاننىڭ دەنساۋلىق ساقتاۋ مينيسترلىگى الەۋمەتتىك جەلىدەگى X پاراقشاسىندا جەدەل ارەكەت ەتۋ ورتالىعىنىڭ مالىمەتىن جاريالاپ، قيراعان عيماراتتاردى ارشۋ مەن قۇتقارۋ جۇمىستارى ءالى دە جالعاسىپ جاتقانىن مالىمدەدى.
بۇعان دەيىن، 3 قاراشا كۇنى، ءبىر تاۋلىكتىڭ ىشىندە يزرايل ارمياسىنىڭ ارەكەتتەرى سالدارىنان 55 پالەستينالىق جانە 71 ليۆاندىق ازامات قازا تاپقانى حابارلانعان بولاتىن. جاڭا قۇربانداردى ەسكەرگەندە، 2023 جىلدىڭ قازان ايىنان بەرى ليۆانداعى جالپى قازا تاپقاندار سانى 2 968 ادامعا جەتىپ، جارالانعاندار سانى 13 319 ادام بولدى.
ايتا كەتەيىك، ءبىر اي بۇرىن ءيزرايلدىڭ بەيرۋت ورتالىعىنا جاسالعان اۋە شابۋىلىنان كەم دەگەندە التى ادام قازا تاپقانى ايتىلدى.
