گرۋزيانىڭ اۋداندىق سوتى داۋىس بەرۋ قۇپياسىن بۇزعانى ءۇشىن 30 سايلاۋ ۋچاسكەسىندە وتكەن پارلامەنت سايلاۋىنىڭ قورىتىندىسىن جوققا شىعاردى. بۇل تۋرالى 5 قاراشادا «ازاتتىق» راديوسىنىڭ گرۋزين قىزمەتى مالىمدەدى، دەپ حابارلايدى “ادىرنا” ۇلتتىق پورتالف.
سوت گرۋزيانىڭ وڭتۇستىگىندەگى تەتريتسكارو جانە تسالكا وبلىستارىنداعى كەزدەيسوق ءۇش سايلاۋ ۋچاسكەسىنىڭ بيۋللەتەندەرىمەن داۋىس بەرۋ جاعدايىن قالپىنا كەلتىردى. ەكسپەريمەنت ناتيجەسىندە بيۋللەتەندىڭ ارتقى جاعىندا پارتياعا ارنالعان ماركەر بەلگىسى كورىنەتىنى بەلگىلى بولدى.
بۇل KOIB-گە (داۋىس ساناۋ ماشيناسى) بيۋللەتەن ەنگىزىلگەندە، سول ماڭدا تۇرعان ادامدار سايلاۋشىنىڭ كىمگە داۋىس بەرگەنىن بىلە الاتىنىن بىلدىرەدى.
گرۋزيانىڭ ورتالىق سايلاۋ كوميسسياسىنىڭ اۋداندىق سوتتىڭ شەشىمىنە شاعىمدانۋعا قۇقىعى بار، بىراق ساراپشىلار پرەتسەدەنت قازىردىڭ وزىندە قالىپتاسقانىن ايتادى.
داۋىس بەرۋ قۇپياسىن بۇزۋ تۋرالى شاعىمداردى گرۋزيانىڭ جاس زاڭگەرلەر قاۋىمداستىعى بەردى. بىرلەستىك 2 مىڭنان استام سايلاۋ ۋچاسكەلەرىندەگى سايلاۋ ناتيجەلەرىن جويۋدى تالاپ ەتتى. تبيليسي جانە باسقا قالالاردىڭ سوتتارى شاعىمداردى قاناعاتتاندىرمادى.
Edison Research باتىس الەۋمەتتانۋ ينستيتۋتى گرۋزياداعى سايلاۋ ناتيجەلەرى قولدان جاسالعان دەگەن قورىتىندىعا كەلدى.
الەۋمەتتانۋشىلاردىڭ پىكىرىنشە، ەكزيت-پولل مەن رەسمي ناتيجەلەر اراسىنداعى 13 پايىزدىق الشاقتىق الاياقتىقتى كورسەتەدى. Edison Research ەسەپتەرى بويىنشا، «گرۋزين ارمانى» 40,9 پايىز، ال وپپوزيتسيالىق پارتيالار 51,9 پايىز داۋىس الۋى كەرەك ەدى.
بيلىكتەگى «گرۋزين ارمانى» پارتياسى پارلامەنتتىك سايلاۋدا 53,9 پايىز داۋىس جيناپ، رەسمي تۇردە جەڭىسكە جەتتى.
تاعى ءتورت وپپوزيتسيالىق پارتيا بەس پايىزدىق مەجەنى ەڭسەردى. ولاردىڭ بارلىعى سايلاۋ ناتيجەلەرىن مويىنداۋدان جانە پارلامەنتكە كىرۋدەن باس تارتتى. وپپوزيتسيا جاپپاي نارازىلىق شەرۋلەرىن وتكىزۋدە.
