تاتارستاندا ۇلى قازاق اقىنى جانە ويشىلى اباي قۇنانبايۇلىنىڭ ءبيۋستى اشىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستاننىڭ مادەنيەت جانە اقپارات مينيسترلىگى حابارلادى.
«تاتارستان استاناسىندا ۇلى قازاق اقىنى جانە فيلوسوفى اباي قۇنانبايۇلىنىڭ ءبيۋستىن سالتاناتتى تۇردە اشۋ ءراسىمى ءوتتى»، – دەلىنگەن حابارلامادا.
شارا قازاقستان پرەزيدەنتىنىڭ 2024 جىلعى 22-24 قازان ارالىعىندا بريكس مەملەكەتتەرى باسشىلارىنىڭ XVI سامميتىنە قاتىسۋ ءۇشىن قازان قالاسىنا جاساعان جۇمىس ساپارى اياسىندا ۇيىمداستىرىلعان.
سالتاناتتى شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا، تاتارستان رەسپۋبليكاسىنىڭ مادەنيەت ءمينيسترى يرادا ايۋپوۆا، قازان قالاسىنداعى قازاقستان رەسپۋبليكاسىنىڭ باس كونسۋلى ەرلان ىسقاقوۆ، تاتارستان جازۋشىلار وداعىنىڭ توراعاسى ركايل ءزايدۋللين، سونداي-اق قالا جۇرتشىلىعى مەن قازاقتاردىڭ ۇلتتىق-مادەني اۆتونومياسىنىڭ وكىلدەرى قاتىستى.
ۇلى ويشىلدىڭ ەسكەرتكىشى قازان قالاسىندا نازارباەۆ جانە كاچالوۆ كوشەلەرىنىڭ قيىلىسىندا ورناتىلدى. ءبيۋستتىڭ اۆتورى – قازاقستان سۋرەتشىلەر وداعىنىڭ مۇشەسى، ءمۇسىنشى نۇربول قاليەۆ.
ايتا كەتەيىك، قازاق باسشىسى اباي – الەمدىك اۋقىمداعى الىپ تۇلعا. ونىڭ شىعارمالارى بۇكىل ادامزاتتىڭ اسىل مۇراسىنا اينالدى. الەمنىڭ تۇكپىر-تۇكپىرىندە اباي قۇنانباەۆتىڭ ەسكەرتكىشتەرى بار.
