اقوردانىڭ مالىمەتىنشە، پرەمەر-مينيستر ولجاس بەكتەنوۆ 2024 جىلدىڭ ءۇشىنشى توقسانىنداعى الەۋمەتتىك-ەكونوميكالىق دامۋ كورسەتكىشتەرى تۋرالى باياندادى.
"ەسەپتى كەزەڭدە شيكىزاتتىق ەمەس سەكتوردى دامىتۋ ناتيجەسىندە ىشكى جالپى ءونىمنىڭ ءوسىمى 4 پايىزدى قۇراعان. ەڭ جوعارى ءوسىمدى اۋىل شارۋاشىلىعى (11,4%), قۇرىلىس (10,1%), كولىك (8%), بايلانىس (6,4%), ساۋدا (6,3%), وڭدەۋ ونەركاسىبى (4,8%) سالالارى كورسەتكەن. 14 وڭىردە وڭدەۋ ونەركاسىبىندەگى ءوندىرىس كولەمى ارتقان. بيىلعى قاڭتار-تامىز ايلارىندا سىرتقى تاۋار اينالىمى 91,7 ميلليارد دوللاردى قۇراعان، ونىڭ ىشىندە ەكسپورتتىڭ ۇلەسى 3,3 پايىزعا كوبەيگەن. وڭ ساۋدا بالانسى 34,8 پايىزعا ءوسىپ، 15,4 ميلليارد دوللارعا جەتكەن. ەل بيۋدجەتىنە 14,9 تريلليون تەڭگە تۇسكەن. الەۋمەتتىك تولەمدەر بيۋدجەت شىعىسىنىڭ نەگىزگى بولىگىن قۇرايدى", - دەلىنگەن پرەمەردىڭ جاۋابىندا.
سونداي-اق ۇكىمەت باسشىسى زاڭسىز يەلەنگەن اكتيۆتەردى قايتارۋ جونىندەگى تاپسىرمالارىنىڭ ورىندالۋ بارىسىندا ءسوز ەتتى.
"جىل باسىنان بەرى كوميسسيا 450 ميلليارد تەڭگەگە جۋىق اكتيۆتەردى قايتارۋ جونىندەگى كەلىسىمدەردى ماقۇلداعان. بۇگىندە مەملەكەتكە 265 ميلليارد تەڭگەنى قۇرايتىن اكتيۆتەر، سونىڭ ىشىندە اقشالاي 177 ميلليارد تەڭگە قايتارىلعان. بارلىق قايتارىلعان قاراجات الەۋمەتتىك ماڭىزى زور جوبالارعا جۇمسالىپ جاتىر. زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى" زاڭنىڭ سۋبەكتىلەرى بىرقاتار جوبالاردى، اتاپ ايتقاندا، مۇقتاج ادامداردى وڭالتۋ جانە الەۋمەتتەندىرۋ باعدارلامالارىن، مادەني-ءبىلىم بەرۋ ورتالىعى مەن سپورتتىق مانەج قۇرىلىسىن قارجىلاندىرۋدى باستاعان", - دەلىنگەن مالىمەتتە.
ايتا كەتەيىك، 24 قىركۇيەك كۇنى مەملەكەت باسشىسى پرەمەردى قابىلداعان بولاتىن. قابىلداۋ بارىسىندا پرەمەر تۇرعىن ۇيلەردى جىلىتۋ ماۋسىمىنا ازىرلەۋ جۇمىستارى 98,3 پايىزعا ورىندالعانىن دا ايتقان بولاتىن. الايدا ەلىمىزدىڭ بىرنەشە ايماعى جىلىتۋ ماۋسىمىنا دايىن بولماي شىققانى مالىمدەلدى.
