Қарағанды облысының Саран қаласы мен Абай облысының Аягөз қаласынан кейін пәтерлердегі суық туралы ақпарат Ақтөбеден де келіп түсті, деп хабарлайды "Адырна" ұлттық порталы.
Бұл туралы ҚазТАГ мәлімдеді.
«Ақтөбеліктер суық пәтерлерде тоңып отыр. Көпқабатты үйлерге жылу қосылды, бірақ барлық үйлер оған дайын болмай шықты», – делінген хабарламада.
17 қазан күні Саран қаласынан кейін Абай облысының Аягөз қаласында да жылудың апаттық өшірілуі орын алған.
Айта кетейік, 15 қазан күні премьер-министр Олжас Бектенов Үкімет отырысында Саран қаласындағы жылу беру маусымындағы төтенше жағдайды қатаң бақылауға алу керектігін айтқан болатын. Үкімет басшысы бәрін бүгін аяқтауды тапсырды.
"Бұл – Саран қаласы әкімінің жеке жауапкершілігі және облыс әкімдігі тарапынан тиісті бақылаудың жоқтығы", - деді Олжас Бектенов.
Қазір автоматика неліктен орталық жылу көзін екі рет тоқтатқанын анықтау үшін арнайы мамандар келіп жатыр екен.
“Қазандық автоматты апаттық режимге қайта оралды. Бұл орнату кезінде дұрыс деп саналады. Сондықтан қазір оның не себепті апаттық режимге өткенін анықтап жатырмыз. Қазандықта жылу берудің бір бөлігі неліктен тоқтап қалғанын қажетті мамандармен бірлесіп тексеріп жатырмыз”, – деді Қарағанды облысының энергетика және тұрғын үй-коммуналдық шаруашылық басқармасының басшысы Тілектес Досаев.
Еске сала кетейік, премьер-министр 24 қыркүйек күні президентке берген есебінде еліміздің өңірлері жылу беру маусымына 98,3% дайын деп сендірген еді.
«Әлеуметтік нысандардың дайындығы жоғары деңгейде. Тұрғын үйлерді жылыту маусымына әзірлеу жұмыстары 98,3 пайызға орындалған. Электр станцияларына жыл сайын 60 миллион тонна көмір қажет. Қазір оның қажетті қоры бар», - деп хабарлаған Бектенов.
