پرەزيدەنت قاسىم-جومارت توقاەۆ جيىن قاتىسۋشىلارىنا ءىلتيپات ءبىلدىرىپ، بۇل ديالوگ الاڭى استانا حالىقارالىق فورۋمىنىڭ اياسىندا قۇرىلعانىن، ەڭ وزەكتى جاھاندىق جانە وڭىرلىك ماسەلەلەر جونىندە پىكىر الماسۋعا ارنالعانىن مالىمدەدى، دەپ حابارلايدى “ادىرنا” ءتىلشىسى اقورداعا سىلتەپ.
“وزدەرىڭىزگە ءمالىم، بۇگىندە ادامزات ايماقتىق قاقتىعىستار، ەكونوميكالىق تۇراقسىزدىق، كليماتتىڭ وزگەرۋى، ازىق-تۇلىك جانە كوشى-قون قاۋىپسىزدىگى سەكىلدى بۇرىن-سوڭدى بولماعان سىن-قاتەرلەرمەن بەتپە-بەت كەلىپ وتىر. اتالعان جاھاندىق پروبلەمالار ءبارىمىزدى تولعاندىرادى جانە وعان توتەپ بەرەتىن شارالاردى بىرلەسە ىزدەگەنىمىز ءجون. ءبىزدىڭ كەلەشەگىمىز قانشالىقتى كۇش-جىگەر بىرىكتىرىپ، ورتاق كەلىسىمگە كەلە الاتىنىمىزعا تىكەلەي بايلانىستى. سوندىقتان قازاقستاننىڭ بۇل ماڭىزدى ۇدەرىسكە اتسالىسۋىن زور مارتەبە سانايمىز”، – دەدى قاسىم-جومارت توقاەۆ.
پرەزيدەنتتىڭ سوزىنشە، كوپجاقتى حالىقارالىق ينستيتۋتتاردىڭ بەدەلى السىرەگەن سايىن، ورتا دەرجاۆالاردىڭ ءرولى ارتا تۇسەدى دەپ سانايدى.
ء“ىرى دەرجاۆالار باقتالاستىققا بوي الدىرىپ، ءبىر مامىلەگە كەلە الماي جاتقان كەزدە، داۋ-دامايدى رەتتەۋگە ورتا دەرجاۆالار ءجيى دانەكەر بولادى. وسىلايشا ولار جاھاندىق ىنتىماقتاستىقتىڭ ىرگەسى شايقالماۋىنا ىقپال ەتەدى”، – دەدى پرەزيدەنت.
قاسىم-جومارت توقاەۆ فورۋم قاتىسۋشىلارىنا ەلىمىزدىڭ ءوسىپ-وركەندەۋى جانە قوعامنىڭ دەموكراتيالىق تالپىنىستارىن جۇزەگە اسىرۋ ءۇشىن قازاقستاندا جۇرگىزىلىپ جاتقان اۋقىمدى ساياسي رەفورمالار جونىندە ايتتى. ونىڭ پىكىرىنشە، اەس قۇرىلىسى بويىنشا تاياۋدا وتكەن جالپىحالىقتىق رەفەرەندۋم ەلىمىزدىڭ دەموكراتيالىق قۇندىلىقتارعا بەيىل ەكەنىن كورسەتتى.
