شەرزات بولاتتىڭ ولىمىنە قاتىستى ۇستالعان ءبىر كۇدىكتىنىڭ اناسى ءادىل تەرگەۋ جۇرگىزۋدى سۇراپ، ۇندەۋ جاسادى، دەپ حابارلايدى "ادىرنا" ۇلتتىق پورتالى.
بەينە ۇندەۋ Kozackov Telegram ارناسىندا جاريالانعان.
كۇدىكتىنىڭ اناسى ۇلى مەن دوسى قايعىلى وقيعا ورنىندا مۇلدە بولماعانىن ايتقان. الايدا قازىر كۇدىكتىلەر قىلمىس تۋرالى حابار بەرمەگەنى ءۇشىن ايىپتالىپ وتىرعان كورىنەدى.
“مەن كازاكەنوۆا لەيلا مارقۇم شەرزات بولاتتىڭ وتباسىنا قايعىرىپ كوڭىل ايتامىن. انا رەتىندە ولاردىڭ قايعىلارىن تۇسىنەمىن، قايعىلارىنا ورتاقتاسامىن. وسى وقيعاعا قاتىستى پرەزيدەنتكە، ىشكى ىستەر مينيسترىنە جانە ەلىمىزدىڭ باس پروكۋرورىنا جۇگىنەمىن. باق-تا باستاپقىدا 13 ادامنىڭ قاتىسى بار ەكەنىن ايتقان، بىراق ءىس جۇزىندە 7 ادام عانا ۇستالعان. ساندى تولتىرۋ ءۇشىن قالعاندارىن جازىقسىز ۇستاعان. ولاردىڭ اراسىندا مەنىڭ ۇلىم كازاكەنوۆ ارلان مەن دوسى روزباكيەۆ يۋلداش بار. ولار قازىر قىلمىس تۋرالى حابار بەرمەگەنى ءۇشىن ايىپتالىپ وتىر”، – دەيدى ول.
ايەل ادام ۇلى مەن دوسى وقيعا ورنىنا مۇلدەم بارماعانىن ايتىپ، ادىلدىكتى سۇرااۋدا. قالعان كۇدىكتىلەرمەن قىلمىستان كەيىن عانا كەزدەسكەن.
"شىن مانىندە ولار قىلمىس ورنىندا بولماعان. وقيعانىڭ بارلىعى بولىپ، بىتكەننەن كەيىن عانا ەر ادامنىڭ ەكى ادامدى كولىككە وتىرعىزىپ، الىپ كەتە بارا جاتقان جەرىنىڭ عانا كۋاسى بولعان. مەرسەدەس كولىگىنىڭ ىزدەستىرىلىپ جاتقانىن ەستىگەن. مەنىڭ ۇلىم تانىسى نۇرقياسقا حابارلاسىپ، نە بولعانىن سۇرايدى. ول ۇلىم مەن دوسىن رىسقۇلوۆ اۋىلىنا جانىنا شاقىرادى. دوسى ەكەۋى بارادى. نۇرقياس جالعىز ەمەس ەكەن، جاندارىندا التى ادام بولعان. تالعارعا قاراي بارعان، جولدا كەزدەسكەن، ارالارىندا ۇرىس بولعان، ارتىنشا پوليتسيا الىپ كەتكەن. ولاردان تۇسىنىكتەمە الىندى، ارتىنشا جىبەرىلدى. 13 قازان كۇنى ۇلىم مەن دوسى 48 ساعاتقا ۇستالدى. ارتىنشا 2 ايعا قاماۋعا الىندى. ولاردى نە سەبەپتى قاماۋعا الىنعانىن تۇسىنبەدىم. ۇستالعان 13 ادامنىڭ ورنىن تولىقتىرۋ ءۇشىن جاسالىپ وتىر ما؟ وقيعا ورنىنا بارماسا دا، كۇدىككە ءىلىنىپ وتىر. ولار ءتىپتى نە بولعانىن دا بىلمەيدى. وقيعا ورنىندا بولعان ەكى قىز قاماۋدا ەمەس، الايدا ۇلىم مەن دوسى قاماۋدا. مەن ءادىل تەرگەۋ تالاپ ەتەمىن”، – دەيدى ايەل.
