مەملەكەت باسشىسى ۇستازداردى مەرەكەمەن قۇتتىقتادى، دەپ حابارلايدى "ادىرنا" ۇلتتىق پورتالى اقورداعا سىلتەپ.
پرەزيدەنت قاسىم-جومارت توقاەۆ ۇستازدار قاۋىمىن كاسىبي مەرەكەسىمەن قۇتتىقتاپ، اسا جاۋاپتى ءارى قاستەرلى مىندەتتى ابىرويمەن اتقارىپ جۇرگەن پەداگوگتەرگە العىس ايتتى.
"مەنىڭ تاپسىرماممەن "پەداگوگ مارتەبەسى تۋرالى" ارنايى زاڭ قابىلداندى. بۇل قۇجات ۇستازداردىڭ زاڭدى مۇددەسى مەن قۇقىقتارىن قورعاۋعا ىقپال ەتتى. قازىر مۇعالىمدەر مەن تاربيەشىلەردىڭ جالاقىسى ايتارلىقتاي كوبەيدى. ولار نەگىزگى قىزمەتىنە كەدەرگى كەلتىرەتىن ارتىق مىندەتتەردەن بوساتىلدى. وسى زاڭعا سايكەس "قازاقستاننىڭ ەڭبەك سىڭىرگەن ۇستازى" اتاعى ەنگىزىلدى. بۇل – جاي اتاق ەمەس، مارتەبەلى مەملەكەتتىك ناگرادا. ونىڭ يەگەرىنە قوماقتى سىياقى بەرىلەدى. رەسپۋبليكا بويىنشا 46 مۇعالىم وسى ناگراداعا يە بولدى. سونداي-اق، قازىر ۇستازدارعا اكادەميالىق دارەجەسىنە سايكەس ۇستەمەاقى تولەنىپ جاتىر. حالىقارالىق وليمپيادا جۇلدەگەرلەرىن دايىنداعان مۇعالىمدەرگە قارجىلاي قولداۋ كورسەتىلەدى. پەداگوگ ماماندىعى بويىنشا وقىپ جاتقان ستۋدەنتتەردىڭ شاكىرتاقىسى 2,5 ەسە كوبەيدى. بيىل بولاشاق ۇستازداردى دايارلاۋ ءۇشىن 16 مىڭعا جۋىق گرانت ءبولىندى. سونىڭ ىشىندە شامامەن 1800 "التىن بەلگى" يەگەرى پەداگوگيكا ماماندىعىن تاڭدادى. بۇل – وتە جاقسى ءۇردىس", – دەدى مەملەكەت باسشىسى.
مەملەكەت باسشىسى بالانى وقىتۋدا تەك مۇعالىم ەمەس، اتا-انا دا جاۋاپتى ەكەنىن ايتتى.
"مۇعالىمنىڭ مارتەبەسى قاشاندا بارىنەن بيىك. ۇلى تۇلعالاردىڭ ءوزى ۇستازىنىڭ الدىندا شاكىرت بولىپ قالا بەرەدى. ءبىر سوزبەن ايتساق، بارشا جەتىستىكتىڭ باستاۋىندا ۇستاز تۇر. ۇلتتىڭ بولاشاعى – ۇستازدىڭ قولىندا. مەنىڭ ماقساتىم – ۇستازدى قوعامىمىزدىڭ باستى كەيىپكەرى رەتىندە دارىپتەۋ. سەبەبى سىزدەر بالا وقىتۋ ارقىلى كەلەشەكتىڭ كىرپىشىن قالايسىزدار. قازاقستاننىڭ دامىعان ەل بولۋىنا زور ۇلەس قوسىپ جۇرسىزدەر. سىزدەردىڭ تاباندى ەڭبەكتەرىڭىز ەرەكشە قۇرمەت پەن جوعارى ماراپاتقا لايىق", – دەدى پرەزيدەنت.
جيىن سوڭىندا مەملەكەت باسشىسى ءبىلىم بەرۋ ىسىندەگى اسا ۇزدىك جەتىستىكتەرى جانە قازاقستان رەسپۋبليكاسىنا سىڭىرگەن ايرىقشا ەڭبەگى ءۇشىن ءبىر توپ پەداگوگكە "قازاقستاننىڭ ەڭبەك سىڭىرگەن ۇستازى" اتاعىن تاپسىردى.
