قاسىم-جومارت توقاەۆ “ەگەمەن قازاقستانعا” بەرگەن سۇحباتىندا بىلتىر ءجيى تالقىعا تۇسكەن تاقىرىپ اەس بويىنشا ءوز جورامالىن ايتتى، دەپ حابارلايدى “ادىرنا” ۇلتتىق پورتالى.
“قازاقستان ءۇشىن تازا اتوم ەنەرگياسىنىڭ ءمانى زور. بۇل – ەل ەكونوميكاسىنىڭ بولاشاعىنا تىكەلەي اسەر ەتەتىن ايرىقشا ماڭىزدى ماسەلە. ءبىز تابيعي ۋران ءوندىرۋ كولەمى جاعىنان الەمدە ءبىرىنشى ورىن الامىز. يادرولىق وتىن كومپونەنتتەرىن دە ءوزىمىز وندىرەمىز. سول سەبەپتى مەن ەلىمىزدىڭ اۋماعىندا اەس سالۋ جايىنا ايرىقشا ءمان بەرەمىن. تۇپتەپ كەلگەندە، ەنەرگەتيكا قاۋىپسىزدىگى ماسەلەسىن گەوساياسي ءمۇددە ەمەس، ناقتى قاجەتتىلىك پەن مۇمكىندىكتەر تۇرعىسىنان قاراستىرىپ، عىلىمي زەرتتەۋلەر نەگىزىندە شەشكەن ءجون” دەدى ول.
تۇرلىشە پىكىر تۋدىرعان اەس ماسەلەسىنىڭ مۇقيات نازار اۋدارۋدى قاجەت ەتەتىن دۇنيە ەكەنىن اتاي كەتتى پرەزيدەنت:
“ەل ىشىندە اەس قۇرىلىسىنا ءۇزىلدى-كەسىلدى قارسىلىق ءبىلدىرىپ جاتقاندار دا بار. بۇل – تۇسىنىكتى جايت. كوپشىلىك سەمەي يادرولىق پوليگونىنىڭ قاسىرەتىن ۇمىتا قويعان جوق. مۇقيات نازار اۋدارۋدى قاجەت ەتەتىن باسقا دا كۇردەلى جايتتار بار. مىسالى، جوبانىڭ قۇنى مەن ەكولوگياعا اسەرىن قاپەردەن شىعارۋعا بولمايدى” دەدى ول.
سونىمەن قاتار، توقاەۆ “سالۋ، سالماۋ” ماسەلەسىن حالىق ءوزى شەشەتىنىن باسا ايتتى.
“سوندىقتان بۇل باستامانىڭ ءمان-ماڭىزىن ەسكەرە وتىرىپ، اەس قۇرىلىسىنا قاتىستى ماسەلەنى جالپىحالىقتىق رەفەرەندۋمعا شىعارۋدى ۇسىندىم. حالقىمىز ءۇشىن اسا ماڭىزدى وسىنداي شەشىمدەردىڭ رەفەرەندۋم ارقىلى عانا قابىلداناتىنى 2019 جىلعى سايلاۋ الدىنداعى باعدارلامامدا ناقتى كورسەتىلدى. «حالىق ۇنىنە قۇلاق اساتىن مەملەكەت» تۇجىرىمداماسى مەن ادىلەتتى قازاقستان قاعيداتتارىنىڭ ءىس جۇزىندە ورىندالۋى دەگەنىمىز – وسى. بولاشاقتا ءالى تالاي قوعامدىق تالقىلاۋ وتكىزىلەدى. ازاماتتار رەفەرەندۋمدا داۋىس بەرگەن كەزدە اەس سالۋدى جاقتاعان نەمەسە قارسى بولعان ساراپشىلاردىڭ دايەكتى پىكىرلەرىن بارىنشا تارازىلاپ، وي ەلەگىنەن وتكىزىپ بارىپ شەشىم قابىلداۋعا ءتيىس. اەس سالامىز با، سالمايمىز با – مۇنى حالىق شەشەدى” دەدى توقاەۆ.
