الماتى قالاسىنداعى پاتەرلەردىڭ بىرىنەن شەتەلدىك ازاماتتىڭ ءمايىتى تابىلدى. بۇل تۋرالى اقپارات الەۋمەتتىك جەلىدە تارادى، دەپ حابارلايدى “ادىرنا” ۇلتتىق پورتالى.
CMN.KZ Telegram-ارناسىنىڭ مالىمەتىنشە، اۋەزوۆ اۋدانىنداعى پاتەردە 50 جاستاعى رەسەي ازاماتىنىڭ بولشەكتەلگەن ءمايىتى تابىلعان. اتالعان دەرەكتى الماتى قالالىق پوليتسيا دەپارتامەنتى راستادى. كۇدىكتى رەتىندە ونىمەن بىرگە تۇرعان ايەل ۇستالدى.
“بۇل دەرەك بويىنشا اۋەزوۆ اۋداندىق پوليتسيا باسقارماسى قىلمىستىق ءىس قوزعادى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. باسقا ءمان-جايلار انىقتالىپ جاتىر”، – دەپ حابارلادى قالالىق پد ءباسپاسوز قىزمەتى.
كتك تەلەارناسىنىڭ مالىمەتىنشە، ەر ادامنىڭ ءمايىتىنىڭ الدىمەن بولشەكتەلىپ، سوسىن ورتەلگەنى انىقتالدى. كۇدىكتى رەتىندە مارقۇممەن بىرگە تۇرعان ايەل قاماۋعا الىنعان. الايدا مارقۇمنىڭ قىزى اكەسىنىڭ اۋىرىپ كوز جۇمعانىن ايتادى. ال مارقۇم مايىتىنىڭ ورتەلۋىن كوزى تىرىسىندە ءوزى سۇراعان ەكەن. مارقۇم ۇستانعان ءدىننىڭ جورالعىسى سونداي دەيدى تۋىستارى.
جانتۇرشىگەرلىك وقيعا قالانىڭ ءتورتىنشى شاعىن اۋدانىندا بولدى. مايىت تابىلعان پاتەرگە العاش بولىپ پوليتسەيلەرمەن بىرگە كۋا رەتىندە اۋلا سىپىرۋشى دا كىرىپتى.
“بالتامەن شاۋىپ تاستاعان. ۆانناعا بولشەكتەپ-بولشەكتەپ كىرگىزىپ، جاتقىزىپ قويعان. بولشەكتەپ تاستاعاننان كەيىن ۇستىنەن وت جاققان. قارايىپ كەتكەن عوي، تىرناقتارى. ءبىر-ەكى ساۋساعى كۇيىپ كەتكەن، قاپ قارا بولىپ. ءار جەرىنەن جاققان. قولىنىڭ ۇستىنە قاعاز جاققان با، ايتەۋىر ورتەگەن”، – دەيدى اۋلا سىپىرۋشى نۇرلان جاپارقۇلوۆ.
