الماتىدا اەس قۇرىلىسىنا قارسى ءبىر توپ ادام ۇستالعان، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
پوليتسيا كۇدىكتىلەردىڭ قاماۋعا الۋ سەبەبىن جاپپاي تارتىپسىزدىك ۇيىمداستىردى دەپ تۇسىندىرگەن.
باسىلىمنىڭ مالىمەتىنشە، الماتىدا اتوم ەلەكتر ستانتسياسى قۇرىلىسىنا قارسى 12 بەلسەندىنىڭ التاۋىنا تەرگەۋ سوتى 2 ايعا قاماۋعا سانكتسيا بەردى.
تۇتقىندالعان 12 بەلسەندىنىڭ التاۋى بوساتىلعان. تۇتقىندالعاندارعا قاتىستى قىلمىستىق ءىس قوزعالدى. ال ۇستالعانداردىڭ ادۆوكاتى تولەگەن بەرلىقوجا:
«ولار قىلمىستىق كودەكسىنىڭ 272-بابى 1-بولىگى بويىنشا كۇدىكتى، ياعني «جاپپاي تارتىپسىزدىك ۇيىمداستىرۋ» دەگەن ايىپپەن سوتتالعالى جاتىر. وزدەرى اەس-كە قارسىمىز دەپ ايتقان. ساراپتاما مەن تەرگەۋ قۇپيا بولعان سوڭ، ەگجەي-تەگجەيلى ايتا المايمىز. ساراپتاما تەرگەۋ ءىسى بىتكەن سوڭ عانا قولىمىزعا تۇسەدى»، — دەپ ءمان-جايدى ءتۇسىندىردى.
