قىرعىزستان پرەزيدەنتى ەلدەگى دوللارلىق ميللياردەر مەن ميلليونەر تۋرالى ايتتى، دەپ حابارلايدى "ادىرنا" ۇلتتىق پورتالى.
ەل پرەزيدەنتى «كابار» اگەنتتىگىنە بەرگەن سۇحباتىندا ميلليونەرلەردىڭ كوپشىلىگى اقشاسىن شەتەلدە ساقتايتىنىن اتاپ ءوتتى.
«ول ءۇشىن ءبىز زاڭداستىرۋ تۋرالى زاڭ قابىلدادىق. بىراق ولار وسى ۋاقىتقا دەيىن اقشاسىن ەلگە تولىق قايتارعان جوق. قاراجاتتى جارتىلاي قايتارىپ، قۇرىلىس سالاسىنا سالىپ جاتقاندار دا بار»، - دەدى جاپاروۆ.
پرەزيدەنت ەكونوميكا مەن مەملەكەتكە پايدا اكەلەتىن جوبالاردى قولداۋعا ۋادە بەرىپ، اۋقاتتى ادامداردى قىرعىزستانعا ينۆەستيتسيا سالۋعا دا شاقىردى. دالىرەك ايتساق، جاپاروۆ تامشى اۋەجايىنا قارسى قوناقۇيلەر سالۋدى ۇسىندى.
«ەلدە توعىز قوناقۇي سالۋ جوسپارلانۋدا. ءبىرىنشىسىنىڭ قۇرىلىسى باستالىپ تا كەتتى. قوناقۇيدى ەكى جىلدان كەيىن پايدالانۋعا بەرۋدى تالاپ ەتتىم. مەن وتاندىق ينۆەستورلارىمىز بەن وليگارحتارىمىزعا ۇندەۋ جاسايمىن»، – دەدى پرەزيدەنت.
جاپاروۆتىڭ ايتۋىنشا، شەتەلدىك ينۆەستورلارعا قاراعاندا وتاندىق ينۆەستورلاردان پايدا باسىمىراق.
«ويتكەنى، تازا تابىس تولىعىمەن ءبىزدىڭ ەلدە قالادى. بىراق سىرتتان كەلگەن ينۆەستورلاردان دا زارداپ شەكپەيمىز. ولار اقشا سالادى، جۇمىس ورىندارىن اشادى، سالىق تولەيدى. بىراق ءبارىبىر وزدەرىنە تازا كىرىس الادى»، - دەپ ءتۇسىندىردى مەملەكەت باسشىسى.
ءجۋرناليستىڭ «ۇلى رۋستامنىڭ مەملەكەتتىك ىستەرگە قاتىسى بار ما؟» دەگەن ساۋالىنا جاپاروۆ جاۋاپ بەردى. ونىڭ ايتۋىنشا، رۋستام ىستىقكول وبلىسىنداعى گولف الاڭىنىڭ قۇرىلىسىنا ينۆەستورلار تارتۋمەن اينالىسادى.
«كەلەسى جىلى اشىلادى دەپ كۇتىلۋدە. بۇل گولف الاڭى بۇكىل ورتالىق ازياداعى اۋماعى بويىنشا ەڭ ۇلكەن الاڭ بولادى»، - دەدى پرەزيدەنت. سونداي-اق ول رۋستامنىڭ قىرعىزستاننىڭ ءار اۋىلىندا جارىقتاندىرىلعان فۋتبول الاڭدارىن سالىپ جاتقانىن ايتتى.
وسى سۇحباتتا نەگىزگى ساۋالداردىڭ ءبىرى بولعان ۇلتتىق قاۋىپسىزدىك مەملەكەتتىك كوميتەتىنىڭ توراعاسى قامشىبەك تاشيەۆتىڭ ۇلى تاي-مۇراستىڭ دا ەڭبەگى ايتىلدى.
پرەزيدەنت جاپاروۆ وعان وزگەندەگى اينالما جولدىڭ قۇرىلىسى ءۇشىن العىسىن ايتتى.
«بىراق بىردە-ءبىر كومپانيا نەمەسە جەكە ادام بۇل جولداردى سالۋعا نيەت بىلدىرگەن جوق، ويتكەنى ينۆەستيتسيا ۇزاق مەرزىمدى پەرسپەكتيۆادا عانا اقتالادى. سوندىقتان «تاي-مۇراس» كومپانياسىنا وزگەنت اينالما جولىن سالعانى ءۇشىن العىس ايتامىز. ءبىز وعان وسى جوباعا ينۆەستور ىزدەپ، تاۋىپ بەرگەنى ءۇشىن العىس ايتۋىمىز كەرەك»، - دەدى جاپاروۆ.
