پاكىستاندا رەسەيلىك ۇشقىشتار مىنگەن تىكۇشاق اپاتقا ۇشىرادى، دەپ حابارلايدى “ادىرنا” ۇلتتىق پورتالى Reuters جانە Aaj تەلەارناسى دەرەككوزدەرىنە سىلتەمە جاساپ.
دەرەكتەرگە سۇيەنسەك، 28 قىركۇيەك كۇنى تىكۇشاق اۋعانستانمەن شەكاراعا جاقىن حايبەر-پاحتۋنحۆا پروۆينتسياسىنىڭ سولتۇستىك ۆازيريستان اۋدانىندا قۇلاعان. بورتتا 14 ادام بولعان - التاۋى قازا تاۋىپ، تاعى سەگىزى جارالانعان.
Aaj حابارلاۋىنشا، تىكۇشاق بورتىندا ءۇش رەسەيلىك تە بولعان.
مي-8 ۇشاعىن پاكىستاننىڭ Mari Petroleum مۇناي بارلاۋ جانە ءوندىرۋ كومپانياسى جالداعان، دەپ ناقتىلادى Aaj اقپارات كوزدەرى. ولاردىڭ مالىمەتىنشە، تىكۇشاق تەحنيكالىق اقاۋعا بايلانىستى شەۆا مۇناي كەن ورنى ماڭىندا قۇلاعان.
شەۆا مۇناي كەن ورنى پەشاۆار پروۆينتسياسىنىڭ استاناسىنان وڭتۇستىك-باتىسقا قاراي شامامەن 200 كم جانە پاكىستان استاناسى يسلامابادتان 230 كم قاشىقتىقتا سولتۇستىك باعىتتا ورنالاسقان.
Washington Post (WP) جەرگىلىكتى پوليتسياعا سىلتەمە جاساپ، اپاتقا قوزعالتقىشتىڭ ىستەن شىعۋى سەبەپ بولعان دەپ جازادى.
«ۇشۋ كەزىندە تىكۇشاقتا تەحنيكالىق اقاۋ ورىن الدى. <...> توتەنشە قونۋ كەزىندە قۇيرىق روتورى جەرگە ءتيىپ كەتتى، وقيعا بويىنشا تەرگەۋ باستالدى»، - دەدى جەرگىلىكتى قاۋىپسىزدىك قىزمەتكەرى WP-گە.
سونداي-اق ول تىكۇشاقتاعى ءۇش رەسەيلىكتىڭ ەكەۋى ۇشقىش، ال ءۇشىنشىسى ەكيپاج مۇشەسى ەكەنىن ايتتى. باسىلىمنىڭ سۇحباتشىسى ولاردىڭ قايتىس بولعانىن ناقتىلامادى.
«تىكۇشاق قونۋعا مۇمكىندىگى بولعانىمەن، وكىنىشكە قاراي، كەيىن ول باسقارۋدان ايىرىلدى. قازىرگى ۋاقىتتا بارلىق ءتيىستى ۆەدومستۆولاردىڭ، سونىڭ ىشىندە پاكىستان ارمياسىنىڭ قولداۋىمەن ەۆاكۋاتسيالاۋ جۇمىستارى جۇرگىزىلۋدە. زارداپ شەككەندەر جاقىن ماڭداعى اۋرۋحاناعا جەتكىزىلىپ جاتىر»، - دەدى كومپانيا وكىلى..
