الماتى وبلىسىندا «قازپوشتادان» ميلليونداعان سومانىڭ ۇرلانعانى انىقتالدى، - دەپ حابارلايدى "ادىرنا" ۇلتتىق پورتالى وبلىستىق پروكۋراتۋراعا سىلتەمە جاساپ.
بەلگىلى بولعانداي، الماتى وبلىسىنىڭ پروكۋراتۋراسى كورسەتىلگەن مەملەكەتتىك قىزمەتتەر ءۇشىن قاراجاتتىڭ ءتۇسۋىن تالداۋ ناتيجەلەرى بويىنشا «قازپوشتا» اق-دا بيۋدجەت قاراجاتىن ىسىراپ ەتۋ فاكتىلەرىن انىقتادى.
اتالعان فاكتى بويىنشا سوتقا دەيىنگى تەرگەپ-تەكسەرۋ جۇمىستارى باستالىپ، ءىس الماتى وبلىسى بويىنشا ەكونوميكالىق تەرگەۋ دەپارتامەنتىنە بەرىلدى.
تەرگەۋ بارىسىندا "قازپوشتا" اق كاسسيرلەرى تۇبىرتەكتەردى بۇرمالاۋ ارقىلى تولەنگەن مەملەكەتتىك باج سالىعىنىڭ ءبىر بولىگىن زاڭسىز يەمدەنگەنى انىقتالدى.
قىلمىستىق سحەما 2021 جىلدان 2023 جىلعا دەيىن تولقۇجاتتار مەن جەكە كۋالىكتەردى راسىمدەۋ كەزىندە جۇرگىزىلگەن.
كەلتىرىلگەن زالال سوماسى 80 ميلليون تەڭگەدەن استام.
سوت ۇكىمىمەن 2 كاسسير اسا ءىرى مولشەردە (قك-ءنىڭ 189-بابى 4-بولىگىنىڭ 2-تارماعى) بوتەن مۇلiكتi يەمدەنىپ العانى ءۇشىن كىنالى دەپ تانىلىپ، باس بوستاندىعىنان ايىرۋ جانە ماتەريالدىق جاۋاپتى، سونداي-اق باسشىلىق قىزمەتتەردى اتقارۋعا تىيىم سالۋ تۇرىندەگى جازا تاعايىندالدى.
