قىرعىزستاننىڭ جوعارعى كەڭەسى 25 قىركۇيەكتە وتكەن وتىرىسىندا اسقار اقاەۆتىڭ ەكس-پرەزيدەنت مارتەبەسىن قايتارۋ تۋرالى وتىنىشىنەن باس تارتتى، دەپ حابارلايدى "ادىرنا" ۇلتتىق پورتالى fergana.agency-گە سىلتەپ.
85 دەپۋتاتتىڭ 71-ءى ەكس-پرەزيدەنتكە ساياسي لاۋازىمدى بەرۋدەن باس تارتۋعا داۋىس بەردى. ال ەكى دەپۋتات پارلامەنت شەشىمىنە قارسى بولعان. ال كەيىننەن ولار قاتەلەسكەندەرىن ايتىپ، پارلامەنت شەشىمىن قولدادى.
جوعارعى كەڭەس سپيكەرى نۇرلانبەك شاكيەۆ دەپۋتاتتارعا اقاەۆتىڭ ءوتىنىشىن قاناعاتتاندىرۋدان باس تارتقاندارى ءۇشىن العىس ايتتى. ول قىرعىزستاننىڭ تاۋەلسىزدىك جىلدارىندا ەلدە جاقسىلىقتان قاراعاندا قايعى مەن قيىندىق كوپ بولعانىن، بۇل ءبىرىنشى پرەزيدەنت رەتىندە اسقار اقاەۆتىڭ ۇلكەن كىناسى ەكەنىن اتاپ ءوتتى.
سونداي-اق، دەپۋتات شاكيەۆ 2002 جىلدىڭ 17 ناۋرىزىندا بولعان اقسى وقيعاسىن دا ايتتى. سول جىلى ەكس-پرەزيدەنت قىرعىزستان تەرريتورياسىنىڭ ءبىر بولىگىن قىتايعا بەرۋگە قارسى شىققان جەرگىلىكتى تۇرعىنداردىڭ دەمونستراتسياسىن اتقانىن دا اتاپ ءوتتى.
«اقسى وڭىرىنەن سايلانعان دەپۋتات رەتىندە جەرلەستەرىم بۇل ماسەلە بويىنشا ءبىزدىڭ شەشىمىمىزدى وتە مۇقيات جانە تاعاتسىزدانا كۇتكەنىن ايتقىم كەلەدى. ونىڭ قانشالىقتى دۇرىس ەكەنىن تاريح كورسەتەدى، حالىق ءوز باعاسىن بەرەدى، بىراق مەن شەشىم دۇرىس بولدى دەپ ەسەپتەيمىن»، - دەپ كەلتىرەدى 24.kg شاكيەۆتىڭ ءسوزىن.
اقاەۆتىڭ 2010 جىلى ۋاقىتشا ۇكىمەت جارلىعىمەن ايىرىلعان ەكس-پرەزيدەنت مارتەبەسىن قايتارۋ تۋرالى ءوتىنىشى پارلامەنتكە قىركۇيەكتىڭ باسىندا كەلىپ تۇسكەن.
«اسقار اقاەۆ 80 جاسقا تولدى. مەنىڭ ويىمشا، ونى زەينەتاقى، قاۋىپسىزدىك جانە باسقا دا نارسەلەر قىزىقتىرمايدى. ول ءالى دە قاۋىپسىزدىكسىز ەمىن-ەركىن جۇرەدى. اسقار اقاەۆ كەزىندە كوپتەگەن كەلەڭسىزدىكتەر بولدى. قىزىعۋشىلىقتار بولدى. بىراق مۇنىمەن قاتار ەلىمىز ەگەمەندىك العان جىلداردا وڭدى تۇستار دا بولدى. مۇنى دا ايتۋ كەرەك»، - دەدى جاپاروۆ اقاەۆتىڭ ۇندەۋىنە تۇسىنىكتەمە بەردى.
اسقار اقاەۆ قىرعىزستاندى تاۋەلسىزدىك العان العاشقى جىلداردان 2005 جىلعا دەيىن باسقاردى. ەلدە توڭكەرىس بولىپ، قۇرمانبەك باكيەۆ بيلىككە كەلگەندە بيلىكتەن قۋىلعان پرەزيدەنت پەن وتباسى مۇشەلەرى رەسەيگە كەتكەن ەدى. كەيىننەن ەكس-پرەزيدەنت ماسكەۋدە عىلىمي جانە وقىتۋشىلىق قىزمەتپەن اينالىستى. كەيىن اقاەۆقا بيلىكتى نەمەسە قىزمەتتىك بابىن اسىرا پايدالانۋعا قاتىسى بار دەگەن سىندى بىرنەشە ايىپتار تاعىلعان.
